“Da pai lah mandi lai, tapi ka bukber ka rumah pak camaik,” Piak Manih bakicau.
“Mbek cah, samak utak den, kama ka pai ko ha,” jawek Pasa.
“Tapi pak camaik ma undang, kanin lah pai. Ado jatah kain saruang cap gajah mah,” tangkas binie manjawek.
“Panik den. Pak camaik maundang, bos lado maundang lo, pak calon bupati tu buko basamo lo. Ma nan kadituruik ko ha. Alun beko lai tim safari Ramadhan pak pati tibo lo,” kecek Buyuang.
” Pak camaik se, nan lain tu bisuak siang se ka sinan, kan lai kenal Da mah. Pak camaik tu pasti ado pak pati pjs tu mah, tu liau-liau tu bakonvoi beko ka musajik wak, sinan se lah cek Piak,” kato nduak barehnyo.
“Jadi nah, den mandi lu.”
Yuang Pasa pai mandi. Di pincuran sobok we-e jo Guru Salek.
“Bagageh mandi mah Pasa, ka pai kama garan?”
“Ang sagalo salah urang. Mandi jadi masalah, tak mandi jadi sangketo,” sanggah Pasa.
“Urang kalau lah sensi mode ko kamari bedo wak dibuek-e. Den kan batanyo nye,” jawek guru.
“Tapi kecek guru tu basayok,” kato Pasa.
“Nan basayok unggeh ndak kecek doh,” jawek guru.
“Sumbaranglah, salang kain basahan cah, lupo den baok,” jawek Pasa.
“Kan den kecek an, bagageh se,” jawek guru.
“Sabun sakali,” kato Pasa. Wee dek bagageh sagalo lupo mambaok ka pincuran. Untuang ado guru basobok sinan.
Abis mandi Pasa lah coga. Babaju guntiang cino wee langkok jo kupiah itam Sarbaini kik tenggi.
“Lah bantuak Pak Hatta Uda den caliak, beda-e Pak Hatta ebat, Uda indak,” kato Piak Manih manggoda pak naknyo.
“Ndak bantuak Pak Husein?” Pasa baliak mampagarahan bini-e.
“Sumbaranglah. Nan jalai pailah Da ka rumah pak camaik tu, jan lupo saruang cap gajah tu, ka Piak pakai sumbayang rayo mah,” cek-e.
“Eeee kukuran karambia, asa pambagian untuak kau, nan wak den tak dapek,” Pasa bakurenah lo liak.
” Jadi untuak Da malah. Kok bisa duo alai mintak yo ha ha,” Piak Manih galak.
Indak lai, sasanjo tu, Yuang Pasa malangkah ka labuah gadang. Harum mewangi wee. Syahdu.
“Ohgun bonagh Yuang Pasa sonjo ghe mah, ka poi kama Yuang?” Batanyo Kutar nan marantau ka Solok nin.
“Kalau urang terkenal mode den ko banyak undangan buko samo Tar, mode ang ko? Bagalumun kain saruang juo lai, cegaklah lai,” kato Pasa.
“Nyo ka pai rumah pak camaik mah. Kanai undang. Kutar lun tau lai sia Pasa? Makoe tagak-an talingo kuali Kutar tu nye den mah,” solang Pakiah nan lah segeh lo sanjo tu.
“Owaik, keghek deyen, tenggi pergaulan Pasa kiroe,” kato Kutar.
Tak lamo antaro-e tadanga onda mandarun. Inyiak wali kiroe.
“Nyiak,” nak rang ko kompak manyapo.
“Ka pai cah babuko rumah Pak Camaik jo Pasa,” kecek Nyiak wali.
Batonggoklah Pasa di onda Nyiak Wali. Ondah mandarun, cigin ka ilia. Nan urang di lapau simpang malapeh jo suduik mato. (Malin Kapalo Koto)
