Yuang Pasa kapiradan se sajak tadi. Bantuak duduak di ateh baro, padahal nan angek kopi di galeh.
“Dek apo Tuen Buyuang ko, bantuak lipeh tapanggang se?” Batanyo Yuang Tembang
“Jan mamakak juo Tembang, beko den ampehan gitar buruak ang tu.”
“Bato, berang se mah.”
Majilis lapau pagi tu tagalak.
“Bae goreng angek ko lu Yuang, sudah tu kok ka marabo, ndak baa doh,”kecek Malano.
“Malano aniang, beko den kabek-an ka tonggak,”kato Pasa sambiak galak tasengeang.
“Dek Yuang Pasa risau se, kalabu se muko tu, jalehanlah,” semba Gindo.
“Ari ka puaso, anak wak ndak buliah pulang.”
“Dulu kan ndak buliah juo mah,” kecek Gindo.
“Dulu yo ndak buliah,tapi ado bus. Kini ndak buliah, bus tak ado, patabang tak ado,” jawek Yuang Pasa.
“Ko kan dek ado barado Yuang, kok indak, suko ati wak se nye. Malah, perantau tu bana nan ndak pulang. Alasan agak paik iduik di rantau. Jadi a nan Pasa risaukan bana?”
“Tuak Bilang dek lai mah, co lah mode kami-kami ko,”jawek Pasa.
“Manga lo Tuak Bilang nan dibae, apo nan inyo kecek an kan batua tu Pasa,” tambah Yuang Kuriak.
“Kan jalai dek Tuen denai tu, Yuang Pasa nan gadang basa batua,” kecek Yuang Tembang lo.
Pagi nan dingin itu, mode biaso,Yuang Tembang balagu, nyo mainkan gitar gaeknyo tu. Lagu Yuang Tembang, “Pulanglah Uda.”
Sajak basajak ko, sajak corona jaek ko,lah labiah sataun ndak lamak duduak di lapau lai. Kadipakai masker, angok sasak, indak kadipakai,awaklai ngilu-ngilu asam juo stek. Samulo anggap enteng se, rupoe ado nan kanai, sajak itu lapau simpang agak langang.
Kini dek alah lamo, ado nan lah bavaksin bagai, lapau simpang lah mulai rami liak. Kapalo arak, Yuang Pasa, baru tibo sapagi ko. Sakali tibo, sakali muram se muko-e itu. Kiroe wee takana anak di rantau nan lah pasti ndak ka pulang.
“Urang kini main transfer se nyo Tuen Yuang Pasa, ndak paralu bagai basobok doh,”kecek Tembang.
“Ang kiro taragak bisa dibayia jo piti, makoe kecek den babinilah lai, mada, hahaha,” galak Yuang Pasa sangenek senye, tapi majelis lapau tasumbua galaknyo.
Lapau simpang ko yo rami kalau pagi, majilis lapau mamasan kopi, teh talua,kacang padi,goreang pisang rajo. Sagalo angek pagi tu. Ado nan datang membali diungkuih dibaok pulang.
Lah ampia jam 9 lapau mulai langang, Yuang Pasa malucuih pai. Ka rumah, inyo ka pai ka pasa jo Gindo, manjapuik piti jua lado. (Malin Kapalo Koto)
