Ota Lapau

Upiak Baralian Baminantu, Yuang Pasa Este-em Se

Upiak Baralian lah tibo di kampuang. We-e ka baminantu. Mantun banalah tu kini. Dari rantau inyo lah pulang. Tigo oto portuner, di tenda ado lo barang bakabek-kabek. Sebagian pulang jo kapatabang. Lah duo ari oncu Baralian ko di kampuang. Sanang bana atie.

Anak padusinyo nan jadi manejer di pabirik ubek nyamuak Pulogaduang dapek calon nan karajo jadi manajer di mall di Jakarta.

Ka manikah di kampuang, makoe agak capek liau pulang mudik. Tantu Yuang Pasa gego dibuek-e. Baa ka indak, oncu- nyo nan pulang. Nakannyo ka bajunjuangan. Sabana es te em, sibuk tak manantu se Yuang Pasa. Lah duo malam mode sipatuang se nyo ka lapaunye. Inggok sabanta, pai lai.

“Sibuk tuen ye,” kecek Tan Tembang.

“Snek ” jawek Yuang Pasa.

” Sabana baputa-puta Yuang tampak dek den, lupo ka lapau,” kato Malin.

“Utang kopi patang alun nyo bayia. Lupo dek sibuk. Biati den,” kecek Pakia pulo.

Yuang Pasa sonyun-sonyum sae. Inyo kini duduak di suduik, dakek daun pintu sorong-sorong balatak-an.

“Lamak sanda mah Yuang,” kato Batuang nan baru tibo.

“Baa kok ka aden se adok kecek jak tadi?”

“Baa ka indak etek awak pulang dari rantau. Mambuyuik saku-saku Pasa mpak dek kami, piti sirah-sirah sae isinyo,” kato Malin.

Yuang Pasa bacarito. Bahwa Upiak Baralian alah duo kali ka Makkah. Bahwa gaji nakan e sabagai manajer ampia saratui juta. Bahwa calon minantu-e nan urang Solok tu gajia ampia lo saratui.

Kadai Baralian di Jakarta tigo pintu tigo lantai. Pakai lif. Anak buahnyo bajibun. Baralian manggaleh kain. Kain untuak baju presiden babali jo inyo.
Anak Baralian ado ampek. Kok nan ngenek mah. Tigo nan lain lah babini. Kayo-kayo sadoalahe. Nan bungsu ko nio manikah di kampuang.

Ka mambantai jawi. Alek gadang. Makoe gego Yuang Pasa ma urus alek tu.

Jawi lah dapek. Tingga makan se lai. Lah bapasan minta digulai-an sakali. Tambah kambiang duo ikuo. Katering bagai ka dipasan.
Tingga malutok-lutok se lai. Nan urang kampuang lah dipasan untuk ka dapua. Kancah lah dicari. Untuak hari manikah se ka dijarangan duo kancah untuk gulai dagiang. Sakancah untuak rabuang.

Yuang Pasa tarui bacaito. Katoe Baralian, mambayia zakat se indak bajadi banyak-e doh. Makoe bisuak ka nyo agiahan ka musajik untuk bali lapiak samusaik, mik ciek sudah tu untuak honor garin satahun

Ndak tantu ka nyo sabuil dek urang lapau lai. Kini urang-urang tu ma angguak-angguak balam sae lai.

“Sudah ko pai lah Yuang lai ka rantau. Ladang lado tu bia den garap,” kato Malano.

” Yo rancak mah, pulang sakali sataun yo. Kami tunggu di lapau ko. Sanang ati den mah,” kecek Pakia.

“Den lah jaran marantau. Bia den di kampuang ko se, ” cek Yuang Pasa nan pernah marantau ka Jakarta tu.
Sadang lamak ma ota, tibo paja ketek.

“Mak, amak diimbau dek Nyiak Baralian, kini,” kecek paja kaciak tu.

” Capek Pasa, gagal alek beko. Basugiroh. Kopi bia den bayia,” kato Malano.

Yuang Pasa maluncua pai, mode kalereng dari saku anak-anak nan tambuak. (Malin Kapalo Koto)

Berani Komen Itu Baik
Tirto.ID
Loading...
To Top