Indak surang juo buya di kampuang Yuang Pasa masuak daftar dua ratui mubaligh nan dibuek dek Pak Mantari Agamo. Buya Sarun, Ustad Malin Mangkuto, urang siak Malin Mudo, nan tamaik-tamaik sikolah ugama, ado agak enam urang, indak ciek juo masuak daftar doh.
“Pakai surek urang bacaramah kini Ngku?” Yuang pasa batanyo ka Angku Malin.
“Den ndak bisa manjawek doh Yuang, beko babalenggu lo tangan den, mode sangkek zaman bargolak sari,” jawab Angku.
“Pusuang den nagari ko mah. Lah Jalai presiden wak dakek jo ulama, kini Pak Mantari mambuak daftar lo, ustad Somad dari Riau nin indak masuak lo doh, baa cito ko nagari angku koh. Ulama kini pakai nomor. Ibo ati den, “ Yuang Pasa malatuih latuih.
“Wak buek se daftar ciek baa nye,” kecek Tan Tembang.
“Tu amuah tuh, mah karateh,” kecek Yuang Pasa.
Karateh tak ado lo. Diambiak kotak rokok, dibukak. Kini pena lo nan indak ado.
“Tuan Baralah salang pena pancatat utang tuh cah,” kecek Yuang Pasa lo.
“Usul ciek, wak skerening lo baanye buya-buya wak ko?” Kato Wan Tengka. Dek ari agak dingin Tengka bagalumun kain saruang.
“Jan curiga se lu, tanyo bana ka pak manteri tu lu, apo sababnyo liau mambuak daftar tui, baru bisa wak mengecak,” kato Mak Pakiah.
“Jadi, kami utus Mak Pakiah pai batanyo ka liau, bilo ka pai? Etonglah bara ongkoi?” Kecek Yuang Pasa.
“Yo WA se, kirim pasan, he he he…” kato Tan tembang
Nan Yuang Pasa alun juo manyurek lai. Ota lah ilia mudiak. Sa isi lapau, ado nan mamihak ka mantari ado nan indak.
“Manuruik den pak mantari itu indak asa buek se tudoh, cadiak apak tu mah,” kato Kuriak Batuang nan jak tadi aniang se.
“Kalau menuruik den indak paralu gai daftar-daftar tu doh, kalau takuik jo kaji ulama, buek-an bana sertifikat,” kecek Angku Malano.
Lai jalai, kecek angku ko, guru-guru se pakai sertikifikasi.
“Nakan den wartawan, pakai sertifikasi lo, baa ulama kok indak?” Tanyo Angku Malano.
“Rumik bana nagari ko taraso dek den mah, buya ba skerening pulo, ba litsus, ko ba usulan lo sertipikat. Satau den nan pakai sertipikat tu tanahnye,” kato Yuang Pasa.
“Tapikia dek den, dulu memang indak buliah ngecek politik di musajik. Kini kecek ulama buliah, baa lo tu,” Yuang Pasa batanyo.
“Dulu memang dipisahkan, kini buliah karano tanyato umaik indak tau soal politik. Buto. Jadi manurik wak buliah senye asa lai indak kampanye pilkada sen,” kecek Tan Tembang.
“Antahlah, lah bi tenggi sikolah surang-surang, makin pusuang lo surang-surang. babuek-buek masalah, bakusik-kusik-an, sudah tu ba bahas-bahas, ele taraso dekden lah,” kato kapalo arak Yuang Pasa.
“nan ele Yuang Pasa, indak nagari do doh,” kecek Angku Malano.
“Payah-payah sikolah se, bantuak layang-layang cindai ikua, tabang tinggi, dijujuik angin, putih, nan salah angin. Indakele tu.”
“Ei Yuang, elok-elok ngecek, jan sumbarang mangango se. Sia nan bakecek-an ele?”
“Awak surang-surang, ilemu ugamo tipih, ka musajik jarang, basidakah indak, mangaji tak amuah. Suko ati-elah daftar-daftar tu, nan jalai angku-angku awak di kampuang ko banyak. Ka liau se awak baraja lai,” kecek Yuang Psa. Sakali ko antah pandai atau sok pandai we-e.
“Saran den, ancak awak bi anok se lah, wak tunggu Pak mantaritu kancogok di tipi sudah ko, wak danga apo kecek liau,” saran Angku Malano.
“Oh iyo lai takana dek den ciek, patang Yuang Pasa kan ka Padang sobok jo Pak Presiden, baa cito-e tu?”
“Sabana den ganggam tangan liau basalam. Kan Pak presiden basobok jo ulama-ulama, ma agiahan sertifikat musajik. Den danga kecek ulama awak tu, sajuak bahaso Pak Presiden, cek buya-buya tu.”
“Sajuak baa Yuang, pakai es?”
“Eee yayai ye. Sajuak tu, barisi, dakek, basahabat, santun. Liau Presiden tu tu kini sabana dakek jo ulama wak mah,” kecek Yuang Pasa.
“Tuh kan den kecek-an, lah jak sari den takok mah,” kato Tan Tembang.
“Ndeh waang lai Yuang, lah ditakok-e lo,” kato Ujang Rantau.
“Biko selah, awak kan rakyaik, mengecek jan talongsong-longsong, saba pa banyak, badoa se awak lai, bia rancak nagari ko. Amiin,” tambah Yuang Rantau.
“Ancak ang doakan diri ang surang lai Ntau. Bajaso itu taraso dek den lain. Baa gak ti?” Kato Yuang Pasa.
Ha ha lapau simpang sabana eboh, tak bakairian sae samalam tu. (Malin Kapalo Koto)
