Ota Lapau

Tsunami Sulawesi Ngilu Jantuang Wak

Pagi tu lapau simpang rami. Yuang Pasa sabagai kapalo arak tamanuang. Nana wee.

“Dek a Yuang, abih ubek?” Batanyo Gindo.
“Jak tadi lai mpak dek den,” kato Pakiah.
“Ngilu jantuang den maliek tsunami di Palu Sulawesi nin ha,” katoe.

“Tigo meter, lah 300 labiah mayik basuo,”tambah Tembang.

“Sabana takuik urang sinan mah Kiah, di awak se alhamdulilah lun ado tsunami lai.”
“Pasa jan bakandak – kandak,” kato Malano
“Ndak doh den bakandak doh. Bara ponten sangkek sikokah dulu?”

Manuruik Kapalo Arak, tsunami tu monster dan ujian sarato peringatan dari Tuhan.

“Jadi usalah wak bagadang ati. Badoalah untuak dunsanak wak sinan, walau awak alun pernah ka Sulawesi,” kato Pasa
Agak serius lapau pagi tuh, ndak ado nan talok bagarah doh.

“Padang kan lai aman Pasa?”
“Kini aman Malano.”
“Yo badoalah awak untuak Padang,”kato Pakiah lo.

“Beko den badoa sudah sumbayang luhua,” kecek Pasa.

Sudah tu curito sampai ka Aceh, gampo-gampo gadang di Padang. Nan nyo takuikan dek sa isi lapau kalau tsunami di Padang.
“Takuik den,” kecek Pasa.

Dari tv didapek kaba, Palu tu kotae rancak. Pantai e elok lo tu.

“Sabana lah lamo dek taragak ka Sulawesi Pasa,” kato Pakiah.

“Samo wak, lai sabangso sa nasib, awak lun ka sinan, urang sinan alun kamari, baa lai,” kato Pasa.

“Kok wak kirim randang baa?” Bakato Tembang.
“Kadang-kadang encer utang anak bujang ko ndak Kiah.”
“Apo bedanyo sangkek Pasa mudo dulu ha ha..”

“Serius mah tuen. Wak buek randang wak bungkui tu antaan ka kantua gubernur, bia dibaok e ka sinan dek petugas,”kato Tembang.

“Sakali ko setuju kami jo Tembang,” kato Pasa.

(Malin Kapalo Koto)

Baca Juga :

Berani Komen Itu Baik
To Top