Trending | News | Daerah | Covid-19

Ota Lapau

Tigo Satangah Em Dirampok Urang, Piti Sadoalahe Tuw?

Dibaca : 2.2K

“Jangkang den dek rampok palasik tu, tigo satangah miliar piti didaruaknyo, sudah tu nyo kundang antah kama. Bagak- bagak, pakek ati nak rang kini,” kecek Tuak Bilang.

Tuak bilang ko kawan dek Tuan Baraleh nan punyo lapau. Wee manggaleh di pasa.

“Baa mantun cek Tuak Bilang? Kerek ka perampok tu Tuak?” Yuang Pasa batanyo.

“Eee sampalah karambia nye den, ma pulo den kerek, cuma geleng-geleng kapalo, tiga satangah miliar dirampok urang siang ari tagak, indak di pasawangan bagai doh, indak tahu urang lalu lalang doh, yo gaca den dek nan kanai rampok ha ha,” Tuak Bilang galak.

“Tu tigo satangah miliar tu piti sadoalahe Tuak?” Yuang Pasa bakucikak lo baliak.

“Handeh Buyuang tralalala, makoe cadiak stek mode deyen ko, jadi datuak,” kato Tuak Bilang.

“Ha ha ha ha, datuak karakalun, datuak alah, bagala alun. Sumbarang sae, nan Bilang mako diimbau datuak dek karajo mambilang-bilang piti se, bukan datuak sabana datuak. Liek den sabanta lai jadi datuak, balewa-an gala di balai adat,” kecek Yuang Pasa.

Galak takekeh nak rang baduo tu. Nan lain di lapau simpang tu sato lo galak. Cuma Guru Salek, tasengeng sae. Wee mamikian piti sabanyak tu kok murah se kanai rampok? Indak bapangawal bagai.

” Takana dek wak ciek, indak ba pangawal bagai oto nan mambok piti sagaban tu?”

“Lah den baco tadi, kecek online prokabar, lai ado tapi surang se nye,” jawek Tan Tembang, anak mudo nan gak gaul stek pandai internet tapi piti sipi taruih, kadang sayuik.

“Nagari awak ko ndak elok lai, rampok banyak, pancilok apolai, tukang cacak jan disabuik, koruptor lah bantuak srigala, penegak hukum bantuak harimau, rakyat lah bantuak cigak indak makan, nan wee eboh sae pemilu ka pemilu. Nagari indak batupai ko kamari sensa,” kato Malano. Esmosi Malano, antah dek apo lah ko.

“Dek a berang-berang Malano? Makan lado kutu tadi?” Batanyo Pasa.

“Lah muak den, urang maliang manjadi-jadi, nan pemerintah hebat sampai ka langik ko, ma urus te ha er pegawai se karajo-e. Awak nan rakyaik badarai ko nyo palapeh sae,” kecek Malano.

“Ancak Malano bisuak pagi balimau yo, malam ko bae teh talua lu, bia tambah naiak darah tu,” kecek Tuak Bilang.

“Duo taluanyo rang lapau, agiah pinang mudo salayang,” tambah Pasa.

“Ko ka mambunuah den? Kalau yo Pasa jo Bilang baniek mode tu, ancak pisau se ambiak, manga teh talua dibuek-an?” Kecek Malano.

“Nan mambuek an teh talua indak kami doh, tapi Tuan Baralah, induk semang lepau ini, jelas oleh Malano tu?” Kato Bilang.

“Rusak pangana den dek rampok zaman now ko,” cek Malano.

“Ha ha apolai wakden, sajak ngenek manggaleh, umua abih di pasa, sabana payah mancari piti. Dek rampok zaman now ko, sabanta senye. Aman lo tu, tigo satangah miliar lo tu, ari ka rayo pulo, handeh nan kaditembak patuih lah rampok tu ye ndak,” kecek Bilang.

“Alah tu Lang, kini seluruh kopi kami, tambah teh talua Malani, rokok den sabungkui, tolong Bilang bayia. Labo galeh lah lipek takulai,” kecek Pasa.

“Jadi aman tu, tapi syaraik-e ado ciek,” kato Bilang

“Apo?”

“Tan Tembang malagu lu, lagu apo tu ha mmmmm, dangdut tu ndeh a lah judulnyo ko ha. Pokok e banyanyi.”

“Kalau ndak amuah gala Tan Tembang kamu cabuik,” tambah Pasa.

“Manyuruah Tembang malagu samo ko manyuruah garin ka musajik mah,” kato Malano.

“Tuduhlah akuuu, sepuas hatimuuuu,” Tembang lah ka namoe. Dihoyak e dangdut ciek.
“Kisai,” kato Pasa.

Urang makin rami, lapau tambah koyun, ari tambah malam. (Malin Kapalo Koto)


Baca Juga :

Berani Komen Itu Baik
To Top