Ota Lapau

Te ha er Taraso Barek dari Puaso. Barasok Kapalo

Indak dapek sarampang padi, batuang dibalah ka paraku. Indak dapek sakahandak ati, kandak nduak samang nan balaku.

Yuang pasa badendang-dendang di muko Guru Salek nan indak dapek te ha er.

Karapai madok ka mudiak, oto madok ka ilia. Urang manuka awak mancaliak, diuruik sajo batang lihia, jawek Guru Salek.

“Bi gadang ati surang-surang mah, bantuak dapek adiak baru,” kato Pakiah menyolang urang nan sadang badendang.

Ka ladang di parak lereng, balari jan mamaguik, urang ma etong kepeng nan awak manciraguik jawek Pasa.

“Alah tu beko den puga surang-surang,” Pakia ampia mangamuak.

“Kiah dek apo berang-berang sae? Bantuak urang sudah dek sawan mpak dek den,” kato Malano.

“Koha paja-paja ko ba pantun jo badendang, sakik kapalo den. Te ha er lah nyo kaji, urang bapitih nan nyo etong. A gunoe?” Kato Pakiah

“Lah jalai Guru Salek tak dapek te ha er basindia-sindia juo,” tambah Malano.

“Guru yo lo, balawan juo tuen Pasa tantu manjadi-jadi parangai-e,” itu nasihat Tan Tembang nan jak tadi agak muno se bantuaknyo.

“Dek a muno bantuak pulang se Tan?” Pasa mancukia.

“Paket abis, nak rang tu jo apo ka dibaleh we-a nyo,” kato Guru.

“Hahai, simambang bungo, sapu tangan sagi ampek, raso badan indak baguno, pacar jauh indak tasapo,” kato Pasa lo.

“Hahai lo liak, kato bulan wee lah tarang, kato Tan Tembang dimana dikau,” sabuik Pakiah manubo

“Jan sato-sato lo Mak Pakiah bantuak ndak mudo lo dulu mpak dek den,” kato Tan.

“Oke bro. Nan te ha er tadi baa?” Pakiah baliak ka pangka.

“Nagari wak ko senewen den raso. Karajo indak, te ha er nio. Bamintak suok kida. Pakai surek bagai. diagiah sangenek wee mangupek, diagiah gak banyak, nan ma agiah tekor,” kato Pasa.

“Kalau bitu indak puaso nan barek doh tapi te ha er,” kecek Tuan Baralah sambia mangabek-ngabek piti saratui jo limopuluah ribu.

“Itu bana nan dikaku dek calon-calon kapalo daerah ko. Den cubo lo mintak. Mambana apak-apak tu. Pucek, takuik jo urang,” kecek Pasa nan pergaulannyo paliang luas di lapau simpang tu.

“Alun lai pejabat. Patang den diimbau dek kapalo dinas, diagiah baju koko salai, saruang ciek. Kato liau, angek kapalonyo ateh bawah mintak te ha er,” kato Guru Salek.

“Kok jo pancarian awak surang-surang se barayo ko baa Pasa?” Batanyo Malano kini.

“Indak cukuik,” kato Pasa.

“Nan cukuik bara?” Malano batanyo liak.

“Sabanyak-banyaknyo”

“Ops pompong, bitu banalah iduik kini ye. Dima ka talok malayani nan mode tu,” kecek Malano.

“Malano bitulah, bisuak pai wak ka kantua bupati, wak caliak bana a nan tajadi, sabana rami. Sadoalahe nunggu te ha er, co ndak diagiah, dikaja-e sampai ka oto, sadiah den,” kecek Pasa.

“Iko karano dek indak ado karajo mah Pasa. Ado bana mode den ko ha, indak cukuik, baa ndak ka kalusuak panja, anak bini alun babaju baru,” kato Guru Salek.

“Kan dek tulah nye deyen, samantaro mancari karajo tu bana nan sulik. Ado karajo inyo maleh. Lai ndak maleh, karajo ndak cocok, dimintak akutansi wee ahli pertanian.Manggaleh? Modal tak adoh. Abih ari dek bapikia, umua batambah juo,” Pasa baceramah wee.

“Stop. Baranti mangecek. Kalau ka bakutubuh di mimbar, kalau ka jadi jupen, kantua-e lah indak adoh. Jadi Pasa anok selah. Nikmati se piti lado tu. Bisuak ka kantua pak pati wak,” kato Malano.

“Oke bos. Kini kopsteng lu Baralah, bia lamak ota snek,” kato Pasa. (Malin Kapalo Koto)

Berani Komen Itu Baik
Loading...
To Top