Trending | News | Daerah | Covid-19

Ota Lapau

Taun Baru, Eboh Se Den Danga

Dibaca : 245

 

Kama Kau Cako Yuang Labu
Ka Parik Andalam Yuang Pasa
Manga waang kiun Yuang Labu
Mancari Durian Yuang Pasa
Dek apo rambuik ang Yuang Labu
Kanai Buah Puluik-puluik Yuang Pasa
Kama taun baru Yuang Labu
Lalok Bakaruah Yuang Pasa.

“Ha ha ha ha, sajak bilo tuen-tuen bapantun co gubernur lo den caliak surang-surang,” kecek Malano sambia takekeh.

“Jan galak ka galak se Malin, bantuak ka babini baru den liek,” kata Gindo.

“Yo tu Gindo eboh se den danga, jangan ucapkan Natal, jan rayoan taun baru,, pakau den nagari ko, itu ka itu se jak sari, “ kata Tuak Bilang.

“Dulu wak caliak, di rumah bupati, walikota jo gubernur ado acara bagai, kini liau-liau lo nan eboh,” kato Yuang Tembang.

“Kini awak lah beriman Tembang, ABS SBK ko lah masuak ka sanubari.”
“Jan mangecek juo lai, tabik simbabau den mandanga,” kato Yuang Pasa.

“Bato Pasa, “ jawek Pakiah.

” Ndak bato-bato doh, sabana alim bana Minangkabau ko kini, eboh dek itu se bantuak indak bariman se awak rakyaik badarai ko mah, palak den. Taun baru itu nan yo ebohan surang-surang, nan nasib awak mode iko sen. “
” Nasib awak tagantuang awak lah,” semba Malano.

” Indak di awak se doh, ado campua tangan pemerintah mah Malano. Den bodoh-bodoh mode ko tahu juo snek-sek mah, “ kecek Yuang Pasa.

” Apa nan Yuang Pasa Kapalo Arak Lapau Simpang nan tahu, curai papahkanlah bakeh kami, bia siang bak ari,” kecek Gindo
Bakatolah Pasa kutiko itu, apo nan liau kecek an, karajo pemerintah untuak rakyaik.

” Biko, pasang talingo kancah wak surang-surang yo. Negara wak ado rakyaik, ado pemerintah. Karajo pemerintah ma urus rakyat, urusan tu antaro lain, mambangun perekonomian. Apo contohnya, mambuek jalan nan rancak supayo tinaman mudo awak gampang dibaok ka pasa. Mambuek pabirik pestisida bia harago racun murah, menjago harago bensin jo solar, sarato jo persediaannyo. Indak mandambin se doh. Kini co caliak, BPJS naiak, tapi ka manolong, tapi mambayia maha lo. Pupuak langka, racun amo maha, suliklo tu. Korupsi menjadi-jadi. Taun baru, taun se nan baru, tapi rasaki awak indak ado nan baru, iyo nasib awak tagantuang awak, tapi pemerintah ko bakarajolah lai, ijan korupsi se nan pandai, naiak darah den. Alah tu” Sabana kareh suaro Yuang Pasa.

“Suai Pasa, tagak jo Pasa den,” kecek Gindo.
“Makoe nan diebohan tu baa ekonomi kesehatan pendidikan anak-anak wak bisa lancar. Indak soal ucapan Natal jo taun baru juo lai, sabab itu lah dalam paruik pangulu mah, lah balanjuang gantang tu, alah tu. Lai siak-siak lo kami rakyaik sarok kuaci ko nyo wahai pemerintah nan ebat sangaik tiado tara, lai jalai tuh? “

Aniang lapau simpang ko, taraso bana kaji samalam ko.

” Alah tu urang lah abang di musajik tu ha, basigiroh lah wak lai sumbayang ba imam-imam, kok yo ABS SBK, “ kecek Pakiah. Bagageh majilih lapau ko ka musajik, nan utang dibayia sudah sumbayang, sabab ka disambuang ota ko baliak. (Malin Kapalo Koto)

Baca Juga :

Berani Komen Itu Baik
Tirto.ID
Loading...
To Top