Ota Lapau

Suaro Dietong Juo, Nan Maningga Batambah Juo

Lapau simpang sapagi ko agak barek ota, demokrasi, pemilu  jo urang mati dek ma etong suaro. Dek banyak bana, 326 urang, tamanuang Yuang Pasa dibueknyo.

“Anak SD tu ha, kalua main sadoalahe kini, antah lai 300 antah indak, yo padiah, dek a nagari ko Malano?”

“Sakali-sakali didanga juo andak-e kecek rakyaik jan kecek urang-urang ebat di ateh karateh se, co iko jadinyo,” jawek Malano.

“Apo mukasuik Malano tu?” Gindo manyolang.

“Eee lai takana dek Gindo, di lapau ko juo mah awak ngecek dulu?”

“Lai Mak, takana dek wak,” kecek Yuang Tembang.

“Ko contoh anak mudo, manangkok utak e, lamo manyimpan,” kecek Malano.

“Jadi mukasuik Malano utak den indak manyimpan lai?” Batanyo Gindo.

“Lai manyimpan, tapi pangana lah ilang-ilang,” Pasa maangek-angek-an. Tasambuah galak majilih Lapau Simpang.

“Wakatu itu, awak ragu lai ka bisa pemilu sadarok, dari bawah sampai ka pucuak, dari dprd kabupaten ka presiden, sensa rakyaik dibuek-e mah,” kecek Malano.

“Yo tu, tapi awak ndak ado mangaji petugas doh, rupoe banyak nan maningga dek stres jo baban karajo nan barek,” kecek Pasa.

“Ko mambunuah mah Pasa, disuruah rakyaik ma etong suaro, pakai mati, apak-apak tu di ateh bantuak anak-anak main kalereng,” kato Bilang.

“Baa anak-anak main kalereng Lang?” Batanyo Pakiah.

“Ntah ma den tau. Ha ha ha ha.”

” Bi mangaku manang, samantaro suaro masih dietong, stress lah tukang etong. Urang antri di lapau se panik kasir, apolai iko ye ndak,” Pasa mengecek.

“Yo santiang Pasa ko taraso dek den,  rugi wak inyo ndak jadi caleg patang ko,” sabuik Gindo.

“Den jan diambok lo lai Gindo, tukang gulai den ko mah.”

“Yo tu lah, batua kecek Gindo tu mah, dek kape-u ko asa karajo lai la salasai se ye ndak. Lai ado ambulan, lai ado bidan, lai ado radio orari, lai ado bpbd, damkar gai di tiok te pe es, atau di tiok 10 te pe es misalnyo. Naiak darah, naiak gulo, seteres, sakik, baa ndak ka pendek umua dek pemilu ko,” iko analisa Malano.

“Kalau dek den, banyak petugas nan maningga, yo wak doa-kan. Marutok-rutok indak ado guno. Ma analisa? Santiang urang pado awak. Wak bacoanlah Alfatihah lu. Alfatihah…”

Aniang lapau. Bi manakua.

“Aamiin. Ko ka ma analisa, baelah, tunjuakan santiang wak tu, “ kecek Pakiah sasusah maminta majilih mambaco Alfatihah.

“Bato Kiah, lah batuduah se kami-kami ko mah,” kecek Gindo.

“Lah ndak buliah rakyaik diskusi lai. Sajak bilo lo tu?” Mengecek Buyuang Tembang.

“Aden ma ingek an sae nye.  Lai indak bantuak katiak ula se, analisa, telaah, diskusi tu. Rancak lahnye, bia mangarati lo awak ubuangan politik pemilu urang mati jo ota lapau,” kecek Pakiah lo liak.

“Ha ha ha Pakia ko bantuak indak ado kejadian se, tapi sayik-e dalam. Awak nyo cimeeh-an juo.” Kato Yuang Pasa.

Ba itulah, ota di Lapau Simpang, indak jaleh sia nan banyak mengecek, nan indak bisa dianjak, ‘kapalo arak’ tetap Yuang Pasa.

“Yolah kok bitu, den pai lu, ka sawah. Bara utang rang lapau, kopi sagaleh, kacang padi sapiriang, goreang pisang rajo ciek, okok satangah,” kato Pasa mendakek ka rang lapau nan sadang ma elo laci. 

Utangnyo bayia, we-e maluncua ka ilia. (Malin Kapalo Koto)

Berani Komen Itu Baik
Tirto.ID
Loading...
To Top