“Tagiah, antah manga-manga se sato-sato lo, tu lah akibaik e kini, anyuik embe dek manyauak, ilang kabau dek kubalo,”kato Pasa.
“Pasa den ingek an liak yo, pepatah tu jan dituka-tuka juo. Aslinyo anyuik labu, dek Pasa batuka jo embe,” kato Malano.
“Pepatah tu harus menyasuaikan diri lo mah Lano, ma ado urang kini ma abiak ayia jo labu. Jo embe kini lai, tu lah jarang lo mah, sabab ayia lah naik ka rumah dek pamsimas,” kato Pasa.
“Itu tando pepatah ko dibuek nenek moyang wak, sangkek tu lun ado embe lai, kalau ka mamakai embe dalam pantun atau pepatah, buek lo surang, jan main tuka-tuka se,”kata Malano.
“Antah iyo Pasa ko, asa ka manuka sae,”kecek Bilang.
“Jan sato lo Bilang, biriak-biriak tabang ka samak, tibo di samak makan padi, lai jalai dek Bilang tu?”
“Kerambil setandan lebat lai jalai lo dek Pasa?”
“Jan bakucikak juo, jadi baa nan sato-sato tu?” tanyo Pasa liak.
“Nyo biko curito nan dengan tuen Pasa, sasudah pilkada patang tu, nan manangkan lah jalai, nah dek inyo maraso jadi pandukuang, lah raso ka nyo kacak se nagari ko. Ondong ayia ondong dadak, kama ayie, inyo lah pai lo ka sinan. Akibaik e, abih pitinyo, karajo tak tatakok. Lah labiah 15 ari paja tu basikencak se. Bantuk labu diabuih ciek, baroyak deknyo pariuak tu,”kecek Tembang.
“Tu baa lai,” Pasa ingin basicapek se.
“Limo baleh ari ilia mudiak, sorak-sorak se, main ikan main garundang, ikan main jo sisiak banyak, garundang main jo paruik buncik. Tak lamo antaro-e lah kuruih dompet ko, abis piti, diminta dana ka ketua tim sukses, kanai tolak, diminta ka wakil-e tak tantu jawab. Madok bana ka calon lai, nyo iyo-iyoan se. Nyo tanam tabu di bibia, ari abih, pitih abih, kini lah bantuak kain buruak disasah, ibo den,” kato Malintang.
“Kini lah inyo lo maraso manang, maraso bajaso, tiok sabanta lo pai liak, kerek den,”kecek Bilang.
“Itu nan kecek an tadi, anyuik embe dek manyauak, ilang kabau dek kubalo tu,” kato Pasa.
“Urang nan rami ma uyua-uyuan kudo bapacu tu, ado nan nyo mukasuik tu. Caliaklah ka galangang. Kalau dalam pulitik, indak ado nan perai doh. Ma intai jabatan mah, jalai lah den lai,”kato Rantau.
“Woi Rantau dima lo jalai dek angku, pagawai indak, tim sukses indak, tokoh pulitik indak, karajo memelokkan banda ka sawah mintuo sen,” kato Pasa.
“Ha ha ha tu apolo beda-e jo Pasa, samo se sayak jo tampuruang tu nye,”kato Malano.
“Suaaaiiii,”kato Rantau.
“Nan manuruik den, bedo lo si kencang dayang-dayang dari anak daro, yu bakalabihan mah, ingekanlah pasa tu, beko dicibian urang, baru tahu,” kato Pasa.
“Nyo santiang pado awak mah tuen Pasa, masa deknyo tujuah muluk tu, bintang salapan, tangka kondiak, tangka jariangau, tangka mancik, jo palangka-an we-e bajalan mah, caro rang kini jo survei,”kato Tembang.
“Tu mah dek santiang e, nyo tunggu durian rareh, harimau sansai se di bawah batang durian tu mah, nyo panjek tang durian? Lah langke. Urang lah bakucatak, jauh sabalum durian babuah, wee manunggu durian rareh, indak engek tu,”kecek Pasa.
“Jadi baa andak-e dek Pasa?”
“Mandian lah nyo ka lubuak kelok tigo tu ha, siram jo ayia daun rasam, kajuik-an, sudah tu ambui ubun-ubun-e,”kato Pasa.
“Bagunjiang se, bi masuak narakolah surang-surang baa nye,”kato Tuan Baralah. Galak badarai urang salapau sapagi tu. (Malin Kapalo Koto)
