“Den caliak bajadi lenggok paja nan lewat sanjo ka patang, baa manuruik Pasa?” Batanyolah Pakiah sapagi ko di lapau simpang.
“Tali suto, kudo dek kuro, temang mpak dek den,” jawek Pasa.
“Nan batua Pasa ndak kudo doh. Aslinyo ungkapan tu dibuek dek urang paburu mah, rancak tali dari anjiang, tali suto, anjiang dek kurok “ kecak Tan Bilang.
“Lai tau den, anjiang tu kasa bana,” kato Pasa.
” Eee Pasa lai lo tau den itu kasa, den ka mengecek an sae nye ma nan asli ma nan diubah,” kato Bilang.
“Kudo selah.”
“Jadi menah”
“Sabanahe baa paja nan lewat sanjo patang tu?” Rantau maulang tanyo.
” Lagak takah sipuluik, ditanak badarai, itu nan maleh den,”
jawek Pakiah.
“Baa ka indak, oto rental, hape cino, piti badarai, nyo ka mambantu awak lo mambuek tabek gadang, embung namoe, tu urusan pemerintah nah,” kato Pasa.
“Yo ndak, ka-a dek wak embung, tabek se banyak,” cek Pakiah
“Paralulah, untuk serap aie kalau kamarau. Pakiah mah ma imbau di mik musajik kalau kamarau, supayo awak sumbayang minta ujan. Basalahan bana kaji Pakiah mah,” kato Tembang nan alun juo pai marantau lai.
“Oh mantun.”
“Mantun, barajalah Pakia steklah,” iko kato Malano.
“Jadi apo urusan paja-paja patang tu?” Pakiah nanyo liak.
“Makelar tak ti den,” kato Pasa.
“Kalau ado nan kadibangun siko inyiak wali tau dulu, indak paja-paja tu doh,” kato Bilang.
“Santiang, saratui ponten Bilang,” jawek Pasa.
“Kalau saratui perai minum pagi wak mah Pasa “ kato Rantau.
“Bato pulo.”
“Biati den dek mak Bilang ko, oom baik deh,” kecek Tembang.
“Oom, ee palasik kuduang, den sampa muncuang tu jo kaui kaki baru tahu,” kato Bilang.
Tabasuik galak urang salapau pagi tu.
Nan Tembang sato lo galak sambia malutok roti sarkana sakarek. Nan sakarek nyo banamkan ka mangkuak kacang padi angek barasok-rasok.
“Takana dek den Pasa baa niniak moyang wak kok santiang-santiang mambuek pantun jo pepatah-petitih yo?” Batanyo Bilang.
“Ntah ndak tau den. Nan lain lah tanyoanlah,” jawek Pasa.
” Yayai ye, karisiak anyuik, jaweklah.”
“Ma den tau, ka tuak niak mamak tanyoan,” jawek Pasa.
“Sabagai kapalo arak tuen Pasa jan ma ilak harus sagalo tahu,” kecek Tembang.
“Kato ang den ko ketua lekam? Pikia surang awak lah bi gadang mah,” jawek Pasa.
“Dek ndak tau mako kami batanyo mah “ semba Bilang.
“Nyo biko mah, kalau ka mangaji adaik jo wakden mako panuhi syaraik-e lu. Indak sumbarang baturunan se kaji ko doh, caya se onggok-e,” kecek Pasa.
“Labiah lo pado masuak karajo syaraik-e ye, tak baraja tak anti,” kato Tembang.
“Dek itu mako tak masak ilemu Tembang mah, kancang ka perai sae,” solo Rantau.
Nan Pasa sabanahe ndak lo tau doh baa kok santiang-santiang niak moyang ko mambuek pasan-pasan lewaik pantun jo ungkapan tu. (Malin Kapalo Koto)
