“Di Padang, kapatang ko den caliak papan jalur evakuasi, nginiang je, palapeh tanyo sae, samantaro baliho pak wali sagadang gaban. Bitu lo baliho pak gubernur,” kato Pasa sasudah mencaliak Palu sasudah gampo di tivi.
“Untuang lai ado tu Pasa, kok indak baa?” Jawek Malin.
“Indak amuah bapikia mode tu doh Malin, Padang tu kan rawan gampo jadi rambu-rambu untuak jalan ka lari tu yo gadang andak-e,” kato Bilang.
“Itu kan kecek Bilang, nan tajadi baa? Ngeneang kecek Pasa. Tu ka manga wak?”
“Antah kok bitu, yo ndak dapek aka dek den doh,” kecek Bilang.
“Manuruik den, ndak ado pangana pemerintah ko ma urus bencana-bencana ko doh, maminteh sabalun anyuik, bapadian se rakyaik kalang kabuik antah kama lari,” kecek Pasa.
“Eee yayai, lah den kecek an, untuang lai adoh tu. Ndak usahlah baharok banyak bana, ada banamo buatan pemerintah, tu proyek mah. Ateh namo proyek samo tau se lah awak,” kecek Malin.
“Indak ciek juo nan ka lalu dek Malin doh,” kato Pasa.
Yuang Pasa wakatu ka Padang mancaliak, papan panunjuak arah evakuasi tsunami memang ketek, laweh dari tapak tangan stek senye. Indak tampak gai. Wee heran baa kok ndak dibuak agak gadang stek kalau la manolong rakyaik juo.
Dalam pangana Pasa, agak sagadang reklama rokok baa nye. Reklame caleg bagai. Sabana gadang. Anggap enteng se bencana di nagari kp. Beko lah tajadi baru hiruak. Tabik rarau, samantaro pajabaik baru ma agiah nasihaik.
“Jan dipikian bana Pasa, lungga tali agak ciek beko,” sabuik Bilang.
Ha ha Pasa maluncua pai. Wee takaja ka sawah. (Malin Kapalo Koto)
