Pangeran Ari jo si Megan Baralek, Umaik Sabana Rami Co Samuik di Batang Jambu

Penulis -

Minggu, 20 Mei 2018 - 21:32 WIB

facebook twitter whatsapp telegram line copy

URL berhasil dicopy

facebook icon twitter icon whatsapp icon telegram icon line icon copy

URL berhasil dicopy

Kapatang sabana buncah tipi di dunia. Kamari diresek samo se siarannyo. Etan di Inggirih cucu rajo manikah. Pangeran Ari apo tu namoe, jo si Megan, artis holiwud. Ciek coga, ciek manih, bantuak balam tigo gayo.

Nak rang tu baralek di istana bakinghem, indak bakicok incek mato urang di lapau simpang doh. Madok ka tipi luruih2. Mancaliak kudo gadang-gadang, ciinan, biati urang di lapau tu

“Mode kudo amtenar ye. Gadang badagok,” kecek Angku Malano
“Ndeh ndeh, sero,” kato Nedi koboy anak mudo nan sadang sikolah es em a. Nedi jo kawan-kawannyo melepok di dakek meja.

Tiok sabanta nan mudo-mudo mamoto tipi nan sadang iduik.

“Woi manga kalian, taragak mode tu?” Yuang Pasa ma hariak anak-anak mudo tu.

“Ko nan jomblo ko Mak Pasa, gilan-gilannyo,” kecek Nedy Koboy.

“Apo tu jomblo?”
“Tu mode Ujang Rantau ndak juo babini. Lalok surang se tarui,” kato anak-anak mudo tu samo-samo.

“Ha ha ha ha yo mah, lah lisuik,” kecek Yuang Pasa.

“Jan sumbarang ngecek se tuen, den gisa kaniang tu beko, baru tahu raso,” jawab Yuang Pasa.

“Woi anok den manonton nakan den baralek ha, bi mada surang-surang beko den kabek an ka tonggak baru tahu,” Tan Tembang menyolong

Memang sudah tu kanai aniang. Urang-urang tu madok ka tipi. Tacangang mancaliak kudo, tentara, bungo-bungo, barisan urang nan ndak putuih-putuih.

“Ko di ulando baralek ko ndak. Yo rancak Amsterdam tu yo. Siko Pak Hatta sikolah dulu?” Mak Pakiah magiah kutubah sakaligus batanyo.

“Ondeh Mak Pakiah. Ko di Inggris, indak di ulando doh. Balain mah Mak, jauah,” kecek Ujang Rantau.

Sadang mode tu tibo rang rumah Yuang Pasa, rang rumah Angku Malano, induak-induak nan lain.

“Abih sinetron deyen dek siaran inggirih ko, kama ka nonton lai ko,” kecek bini Yuang Pasa.

“Oi Piak iko induak angkang sinetron ko mah, kau caliak lah, sakali konyo koh. Sudah ko antah bilo lai. Agak moderenlah stek baanye?” Sakali ko agak naik darah urang lapau, Tuan Baralah.

“Indak ee, nye deyen tadi kok icak-icak se,” jawek bini Yuang Pasa.

“Ko alek paliang maha di dunia mah Tek. Cincin ratu baru tu se berlian dari Sirie Leon, wak jua sawah sakampuang ko alun tabali lai cincin tu,” kecek si koboy nan gilo selpi-selpi se.

“Ang gilo bapoto se jak tadi. Untuak sia dek ang? Pasti ang kirim ka Reni anak Rosma kan?” Bini Yuang Pasa main tembak se.

“Baralek se lah ang lai, lah bantuak lipeh tapanggang mpal dek den, gelisah se. Kadang bantuak kureta lansir di stasiun se, cakaulah lai, beko lapeh paja manih tu, gilo ang dek nyo,” tambah bini Yuang Pasan.
Pacah lapau dek galak.

Tipi tarui se siaran dari London. Ado-ado se ka nyo sampai-an dek penyiar ko. Subanglah, sikek abuaklah, gaunlah.

“Pakau den, mode ko bana duya, kopi steng lu rang lapau, lah awih den. Lah malam lo ari ha,” kecek Angku Malano.

Lapau simpang lah rami. Koyun kadai samalam kapatang. Domino tutuik, urang madok ka tipi se.

Si Ari jo si Mikel lah manikah. Sonyun-sonyun nak rang tu.
Dah tu wee baduo diarak jo kureta kencana. Ampak kudo putiah ma-irik kereta tu.

Ondeh mak tuen, sabana rami umaik, mode samuik tacangkua di sarangnyo. Babarih mode anak sikolah sangke dulu wakatu manunggu Pak Harto Turba ka kampuang awak. Anak-anak mangibarkan bendera.

Bedanya di Inggirih ko urang datang sukarela, sangkek dulu tu dikerahkan dek sikolah. Beda nan lain, presiden Soeharto tak ado malambai. Kalau iko malambai suok kida.

Bitu banalah kaba dari Inggirih, ijan ditiru lo lai, abih sawah amak deknyo. Untuak ka dicaliak-caliak di tipi senlah. (Malin Kapalo Koto)

Follow WhatsApp Channel prokabar.com untuk update berita terbaru setiap hari Follow

Berita Terkait

Rirayo, Buruak Manuang Pakiah
Pitih Baru, Badariang
Korona:Ba Bapak Anak Ka Urang Lain, Lai Talok?
Kurenah Puasa di Dunia Maya
Pakiah Mulai Indak Ka Lapau Simpang
Yuang Pasa Kapiradan
Simpai nan Lincah Kenapa Disiksa
Cucuak

Berita Terkait

Kamis, 13 Mei 2021 - 17:47 WIB

Rirayo, Buruak Manuang Pakiah

Kamis, 29 April 2021 - 19:20 WIB

Pitih Baru, Badariang

Selasa, 20 April 2021 - 22:48 WIB

Korona:Ba Bapak Anak Ka Urang Lain, Lai Talok?

Sabtu, 17 April 2021 - 13:46 WIB

Kurenah Puasa di Dunia Maya

Selasa, 13 April 2021 - 01:09 WIB

Pakiah Mulai Indak Ka Lapau Simpang

Berita Terbaru

Artikel

Pukul 23.00 WIB, Uang Tak Laku Lagi di Pasaman

Selasa, 6 Okt 2026 - 20:33 WIB