Ota Lapau

Ndeh “Bom” Kabanyo di Kampuang Deyen Lo Lai Kini

Yuang Pasa kalusuak anyak se jak sonjo cako. Alun ado lawan ma ota tibo di lapau. Wee lah dapek info ado dus di Batusangka dakek musajik bantuak kotak bom. Basugiro polisi ka nin.

“Bom ka bom sae, indak tanang iduik doh,” Yuang Pasa ngecek surang se.

Ndak lamo antaronyo datanglah Tan Tembang basiua-siua.

“Kamarilah ang, pusuang den surang se,” cek Yuang Pasa.

“Dek apo engkau wahai Buyung Pasar nan ganteng,” kecek Tan Tembang lo.

“Handeh ang lai ye. Lisen mi, ang danga den. Batusangka citi bomber eteks,” cek Yuang Pasa.

“Astaufirullah, lah mode bule ka ilangan sarawa tuen Yuang Pasa mah, gaca den,” kecek Tan Tembang.

“Den jan diago lo jo bahaso Indonesia lai. Arab, Melayu, Cino, Ulando, Inggirih di lua kapalo den mah,”jawek Buyuang Pasa.

“Jan sado urang ka diloge tuen, beko den aban kapalo tuen tu jo tabuah musajik nin ha, mandanguang buliah,” kato Tan.

“Biko ha Tan, ngilu den. Bon malatui di Surabaya, di Medan. Di Pakan kantua polisi kanai daram dek teroris. Di Jambi kantua polisi lo nyo aban. Kini ado paket bantuak dus dakek musajik tangah pasa di Sangka. Bom cek urang. Lah basikakeh lo polisi ka nin,” apa lo dek Yuang Pasa.

“Andesten, andesten,” jawek Tan Tembang.

“Ang ulang juo baru bahaso Inggirih tu ye,” solang Yuang Pasa.

Nak rang baduo tu lah badiskusi soal bom atau dus bantuak kotak bom. Nan Yuang Pasa mangaku ngilu-ngilu asam kalau ka pasa. Nan Tan mode tu juo tapi indak dek karano bom doh tapi dek pitih sarik.

“Ngilu daku tuen Yuang Pasa, money tak ado. Ka dianduak wak di pasa, bilo ka dibayia,” kecek e.

“Biko selah Tan, jan kama-kama lu malalik nagari ko aman, beko kapiang kapalo ang tu dek bom,” kecek Yuang Pasa.

“Indak mode tu bana doh Yuang Pasa ganteng. Indak sangeri tu bana doh. Minangkabau ko aman-aman se nye.”

“Kok bitu cek ang kabaa juo lai “ kato Yuang Pasa.

Sambia manunggu kawan tibo nyo kocok batu domino. Main we-e baduo sen.

“Turunlah Tan balak kosong sinan mah.” Nyo hampean den Tan balak kosong tu. Masuak anam kosong dek Yuang Pasa. Nyo tuncik jo balak anam dek Tan.

“Lamah bana lawan,” cek Tan.
Yuang kini turun. Nyo layok-an batu duo kosong. Tan mambaleh jo duo ampek. Masuak balak ampek Buyuang.

“Merah matoe tampak dek ang tu Tan. Bapikia lah stek lah,” kecel Buyuang.

“Darrr…” basijadi Tan mahampean batu. Baserak.

“Elok-elok main stek wak di kadai urang, indak di rumah bako doh. Kanai usia wak beko,” kato Buyuang.

Limbak nan dari pado itu tipi nan di Padang mulai siaran rupoe. Alah ado info soal bom ko tapi alun ado gambar.

Nak rang baduo ko tacingangak mandanga. Ari lah barabuik sanjo juo. Sabanta lai babuko lai. (Malin Kapalo Koto)

Berani Komen Itu Baik
Tirto.ID
Loading...
To Top