Ota Lapau

Masak Pagi Matah Siang, Bensin oh Bensin Oiii

Nasib bensin di nagari awak ko, bantuak jungkek kapuang. Capek naiak, kancang turun. Menembak ndak sakali kanai.

“Sabana talen, diumumlan naik, eee batal liak, baa mode tu ma urus nagari,” kecek Yuang Pasa.
” Yuang nikmati se iduik tu jan mode politikus lo, bara ka mangecek, diimbau ka Istana sanang utak- e,” kato Gindo.

“Heran den dek Gindo, mangecek se ndak buliah lo, kan batua mah, bensin batal naik.”
“Tu baa?”
“Bantuak Gindo nan punyo bensin mpak dek den.”
“Yo ye, kok naiak bensin tu naik lo ongkos mah Pasa.”
“Lah la jaleh se tu nye,” kato Pasa.
“Angkot yo naik, ojek ndak, wakden lah lamo naik ojek se,” sabuik Malin.
“Baa tu?”
“Maleh, angkot ko sampik.”
“Ooo”

“Kalau bbm naik mode-mode kini bapangaruah ka pilpres mah Gindo,” kato Kuriak Batuang.

“Bato pulo. Bisa turun suaro Pak Jokowi mah ye ndak,” kato Gindo.

“Pasti,” sabuik Pasa.

“Makoe dibatalkannyo dek Pak Jokowi,” sabuik Kuriak.

“Lah batua tu,” kecek Malin.

“Kan nan manaiakan Pak Jokowi juo,” semba Bilang.

“Kalau tu ndak jaleh dek den doh. Nan jaleh mantari ngeceknye,”sabuk Pasa.

“Ncak lo ndak?”kato Tembang.
“Apo nan rancak?”
“Bbm naik dah tu dibatalkan. Ndak ncak tu dek tuan Pasa.”
“Sabaliak itam, sabaliak putiah, jingkrak, samo jo itu mah” sabuik Bilang.

“Bantuak main-main se lai lo nagari ko,” kato Pasa.
“Pasa jan talongsong-longsong ngecek, bakabek tangan ka lakang beko,” Malin ma agiah nasihaik.
“Iyo bagawa beko.”

“Bocan den dek kalian mah, cubolah ndak bantuak main-main se tu tapi sudahlah, ari dingin-dingin mode ko yo sero kopi. Tambah aie angek stek rang lapau,” kato Pasa.

“Wak yo lo,”sabuik Tembang.

Sapagi nan dingin tu lapau simpang rami. Lah lakik siang alun juo bubar lai. Apak-apak tu bagalumun kain saruang, lah lewat jam 10 ujan ndak juo baranti doh. Labuah basah, angin agak kancang. Lah Oktober ujan lah turun, nan ka sawah sanang atie. Lado baganti padi.

Sakali-sakali lalu urang bahonda, oto ciek-ciek. Kalau lah ujan mode ko, majilih lapau libur batani. (Malin Mapalo Moto)

Baca Juga :

Berani Komen Itu Baik
To Top