Trending | News | Daerah | Covid-19

Ota Lapau

Malano Kanai Corona

Dibaca : 2.1K

“Sabana poniang den dek nagari ko Yuang, kecek mantari perhubungan oto pesawat dari Jakarta buliah barangkek liak ka Padang. Kama se, buliah, asa lai ndak mudik. Kecek Istana indak buliah. Kecek Jenderal Doni Mardono,dilarang. Titik.”

“Manga Malano, ka pai kama?” Yuang Pasa batanyo.

“Indak kama-kama doh, tapi den danga den caliak di tipi mode tu nan tajadi,”kecek Malano pulo.

“Matian tipi tu, apo lo sahgik-e tu,” manyolo Gindo.

“E yayai, indak tipi den doh, tipi rang lapau, cako.”

“Malalo ko den rasolah kanai virus corona ko mah,” tambah Pakiah.

“Den raso iyo, lah sedeang, kamari mangecek se,”tambah Yuang Pasa.

“Dangalah elok-elok, lakek-an talingo kuali wak tu surang-surang. Paratamo,di lapau ko wakden nan basikareh, indka labiah dari 5 urang, buliah 6 tapi jo urang lapau,duduak jarang-jarang, kalau ado nan baru masuak, nan surang harus kalua, itu aturan den buek, rang lapau satuju.”

“Sajak bilo Malano diangkek jadi tukang arak di lapau ko?” Batanyo Gido
“Sajak Tuen Pasa pai ka rantau, kini lah baliak,alun ado timbang tarimo jabatan lain doh,”kecek Tembang.

“Kini baliak an jabatan tu liak, pado bapakaro wak kudian ari,”kacek Pasa pulo.
“Danga iko lu, soal jabatan, ndak manyakik bana tu doh. Nan kaduo, awak disuruah dek pemerintah lokdon, di rumah sajo, iko pesawat, oto bus buliah manambang baliak, ko corona ko lah manari-manari ha, baa kok caya se nagari ko jadie, itu nan pikia-an, awak ko anak pejuang Yuang.”

“Kalau itu suai den,” kecek Buyuang Pasa.
“Suai aponyo?” batanyo Tuak Bilang
“Suai jo pandapek Malano, den caliak Bilang satolo ma asuang-asuang mah.”
“Pasa jan tasingguang lu,ko cito wak soal patabang mah,”kecek Bilang.
“Wakden yo alun ado naik patabang lai,”kato Malano lo liak.

“Manuruik utak den nan ketek ko ha, awak-awak ko mode pakai helm, mode tu lo Pe es be be ko, dimana ado polisi baru lakek helm, kalau indak, batangga-an liak.Dari ateh sampai ka rakyat di bawah mode itu sadoalahe,”kecek Buyuang.

“Kerek den, walau indak sikolah, tapi lai jalang utak Buyuang ye,”kata Malano.
“Ha ha ha ha…..”Badarai galak di lapau sakali ko.

“Antah kok indak, lah rangkiah pejabat dek ma imbau, ulama bagai, jan malala juo, nan awak pai juo ka pasa, ma renten kama-kama gai. Ado den danga nan indak picayo gai jo corona ko, baru manangih sangkek lah kanai.Lah kanai anak,lah kanai kawan,lah kanai urang di musajik, baru we-e manyasa,”kecek Buyuang

“Memang urang awak sa Indonesia Raya ko tuen, indak patuah, we-e maraso hak demokrasi HAM, kebebasan, maraso santiang, lah rabah baru manyasa,”kecek Tembang.

“Kalau Tembang ngecek picayo den, sabab anak mudo matah ko lah awak sikolahan, lai baguno sikolahe ye ndak,”kecek Pakiah menyolo.

“Ha ha ha ha, tapi alun dapek bini, baa lo tu?”Batanyo Pasa.

“Carianlah dek Tuen Pasa ciek, bia taturuik lo dunia orang dek wak,” jawek Tembang.

“Manga lo den, mamak ang ado mah, atau imbau mamak tu kamarilah bia en sikolahan stek,”kato Pasa.

“Suai bana daku wahai Pasa. Cucok bana, sanang ati den, ampu balenggek, yo mode itu-an ciek, Tembang ko mada lo dari gajah mada lai,”solo Gindo.

“Jadi baa patabang jo bus tadi, buliah, indak buliah.Tu buliah lo liak? Jan wakden lo nan jadi sasaran ota ko lai,”kecek Tembang membaleh.

“Itu urusan urang di ateh, jan sato lo Tembang, abih sinar gitar ang tu ndak ka salai doh, ancak ang anok se mode den ko ha,”kato Pasa lo. (Malin Kapalo Koto)


Baca Juga :

Berani Komen Itu Baik
To Top