Ota Lapau

Lah Pindah Bukota Ye

Andeca andeci

Ibukota lah pindah kini
Andeci andeca
Piti abih bali bada

“Yuang Pasa manga gerincang bana, badendang-dendang bantuak dapek bini baru se,” kato Angku Malano.

“Agiah barangok den, jan satu tibo satu ditanyo, bantuak kumpeni Malano mah.”
“Bumi Manusia, Mak.” Semba Tembang.

“Apo tu? Bekolah bumi-bumi tu. Danga curito den lu,” kato Yuang Pasa. Suaroe kareh. Aniang lapau simpang dubueknyo. Maklum kapalo arak nan mengecek

“Pasang talingo kuali wak surang-surang yo,” kato Pasa.

“Yo capeklah, den lah gelisah co manunggu bini ka malahian mah,” kato Tuak Bilang.

“Biko, eboh nagari ko, nan batarompa kida apolai, soal pindah ibukota dari Jakarta ka Kalimantan Timur.” Yuang Pasa diam sabanta.

“Dulu Kik Tenggi ibukota mah, biaso-biasoe se nye. Kini eboh se. Lai jalai dek tuen-tuen sa isi lapau ko, Jawa tu lah padek, urang rami bantuak baralek se tarui, apolai Jakarta, lah sasak.”

“Oi Yuang, kalau itu manga bukota nan pindah, pusek-pusek bisnis pindahan. PLN pindah ka Padang. Kantua pusek BRI pindah ka Balikpapan. Kantua kuretapi pindah ka Palembang, PSSI pindah ka pokanbaru, baa kalau bitu?”

“Ancak Tuak Bilang ambiak uduaklah, sudah tu baru mengecak,” kata Malano.

“Kalau pindah, tantu batambah lo rantau urang awak ciek lai?” Kata Yuang Tembang sambia main gitar.

“Santiang Ang Tembang. Yo tu nye den,” kato Pasa.

“Yo, tapi gitar tu campak an lu, mandanyuik talingi den deknyo” kato Gindo.

“Dulu lai takana Batam baru babukak, saparo warga Batam tu urang awak mah, kini dek lah salah urus, urang awak pai lo lai.” Iko analisa Tembang.

Manuruk Pasa ibukota pindah indak karajo murah doh. Nan murah manyabuik se.

“Sarik tu mah nak rang, jadi kok ka indak satuju, ancak jan bakalabihan, saban ilemu wak ndak cukuik. Kalau ka mandukuang, jan pasuak lo kupiah dek basilonjak, ilemu indak lo ganok, jadi biaso-biaso selah. Nan jaleh kalau manuruik den, kue bangsa ko, yo harus dibagi-bagi ka daerah, tapi wak ebat dalam otonomi daerah, tapi ota se dalam pembangunan ekonomi,” kato Pasa.

“Jadi baa lai Pasa, yo ka pindah juo bukota ko?” Malano batanyo liak.

“E yayai ye, iyo. Tu mah alah diumuman dek Pak Presiden. Den setuju asa ja cino lo nan mambangun bukota ko.”

“Suai Pasa, jan cino lo maju, sansai wak beko,” kato Gindo.
Bitulah sanjo patang, ota baranti dek urang lah abang di musajik.

“Lah tu, urang lah azan,” kecek Malano. (Malin Kapalo Koto)

Berani Komen Itu Baik
Tirto.ID
Loading...
To Top