“Dapek kaba den di Bugih nin kotak kosong manang. Apo kotak tu jadi walikota?” Alun tacacah dek duduak lai, Malin lah batanyo.
“Duduak elok-elok lu Lin, baru batanyo,” kato Tan Tuah
“Ndak tahan den lai, demokrasi apo pulo ko namoe, disarahan nagari ka nan cadiak, yo bama nyo lego,” kato Malin.
“Nyo bitu mah Lin, di nagari demokrasi ko kan suaro nan manantuan,” kecek Tuah.
“Kalau itu lai jalai dek den nye,” cek Malin.
“Man indak jalai apo dek tuen Malin?” Tembang manyolang.
“Baa kok bisa kotak kosong nan manang?”
“Dek nan lawan-e nan urang tu, indak katuju dek rakyaik,” kato Tuah.
Di Makassar nin urang mamiliah walikota. Calon tunggal. Dek surang se ba adu jo kotak suaro kosong. Ndak tahunyo kotak kosong tu nan manang.
“Dek a tuw kok kotak kosong manang. Itu nan den heranan mah.”
“Sato den lai. Mangkoe kotak kosong manang dek rakyaik lah muak. Wee maju mangapil kapalo harimau. Mantang-mantang nakan wapres kaba-e. Kacak batih lah bak batih, kacak langan lah bak langan, nan urang ka nyo bali sadoe. Muak rakyaik tak nyo piliah. Kotak kosong nan dipiliah rakyaik. Lai tau raso. Idok an lah,” kecek Pasa
“Oh mantun. Kayo selah den tak ka mamintak, cadiak se lah den tak ka batanyo, pilkada se lah den takkan mamiliah ha ha ha yo sero lo ye,” kato Malano.
“Malano lah tau tapi batanyo juo,” kecek Tan Tuah.
“Panasaran den, adolo gai ha ha yo sero ndak. Siko gak sakali tajadi lo mah, liek lah,” kato Malano.
Urang lapau simpang ko walau randah sikolahe tapi soal musyawarah, mamiliah, demokrasi, tau bana. Kalau lah ndak lamak ati lai mako alamaik ka kalah mah.
“Asa badatak ati kalah mah. Ati rakyaik ko kosong jo pulitik mah. Makoe kato nan cadiak-cadiak, suaro rakyaik suaro Tuhan,” kato Tembang lo.
Anggota lapau tu lah bocan pilkada ka pilkada se hasil e koruptor baru.
“Den lah bocan mah,” kato Tuah
“Ha ha lah banyak rakyaik nan bosan tapi kan awak ba demokrasi, harus sato,” kecek Tembang.
“Yo den sato tapi kalau ado kotak kosong den cucuak saratui kali bia telak manang e,” kecek Pasa lo.
“Kotak kosong kalau manang samo ko kaliki jantan babuah mah,” kato Pasa.
“Salamo ko labek dek bungo se nan sakali ko babuah. Batua-batua ha ha,” kato Tuah.
Lapau simpang sapagi tu mambahas kotak kosong. Alun surang juo nan lah pai ka Makassar ha ha. (malin kapalo koto)
