Sabana sensa rayo ko. Ka baa lai. Agak paik piti kini. Bisa ka lakang suok dibuek-e.
“Payah iduik kini, sagalo susah, baa aka lai Pasa?” Batanyo Tuak Bilang.
“Kufur nikmat tantu iyo,” kecek Pasa.
“Barang siapa nan kufur nikmat, mako nikmat akan lanyok. Nan ba syukur tantu batambah-tambah,” kecek Pakiah.
“Aden menggambarkan situasi se nye Pakiah jan den disumpahi,” kecek Bilang
“Kato da ulu batapek-i, kado kudian bacari-cari,” kecek Pakiah.
“Iyo mah, Bilang asa ka malambuang se, mode ambui-ambui,” kecek Pasa.
” Eee kudo nil, aden lo nan bahampai,” kato kecek Bilang.
“Oi Bilang, jan mancaliak kateh, kalimpanan. Ka bawah mancaliak,” kecek Malano dari suduik.
“Malano danga den yo. Kalau ka bawah tarui mancaliak tu namoe muno, pasif kato rang kini. Awak harus aktif, makoe Malano jan candu bana mandanga lagu saluang tu,” kecek Bilang.
“Nan jalai Bilang kufur nikmat,” kecek Pasa.
“Yo malah, mou den banyak-banyak,” kato Bilang.
“Tu baru jantan Bilang mah,” kecek Malano.
“Tapi taraso dek den, gak payah iduik kini, antah kok awak lai toke aman mah,” sabuik Pasa.
“Cindaku tadi den basalahan,kini ba akui lo,” sabuik Bilang.
“Den tagak di Bilang se lah lai,” kato Pasa lo liak.
Apo nan dipakecek an urang tu batua juo. Iduik susah, paik. Piti banyak tapi di urang nan di awak angan-angan sae.
“Baju anak alun babali lai, kalian bacirangiak juo,” kato Kuriak Batuang sambia manapuak meja.
“Samo wak Tuang,” kecek Pasa.
“Wakden sangsaro bana kini, lado dek ulek. Racun ko maha bana, naik taruih harago-e,” kecek Kuriak Batuang.
“Kok itu nan ka disabuik, antahlah. Jak sari lai, pemerintah wak ko rintang dek ota se,” sabuik Malano.
“Baru tau Malano ye,” kato Kuriak.
“Kalau wak batanam lado saparoh piti abis dek racun tu. Pestisida kato insinyur pertanian, baru sudah tu pupuak,” Pasa manjalehan.
“Makoe buek pabirik e ciek,” kato Tembang.
“Tembang usah sato, baa ka mambuek pabirik e, untuak baju rayo anak sa tak ado piti,” semba Kuriak.
Sabana boneh ota malam tu tapi indak ado jalan kalua-e. (Malin Kapalo Koto)
