Ota Lapau

Kaba-e Namo Bandara ka Baganti. Nan Yuang Pasa Lun Ado Naik Patabang Lai

“Tuen Yuang Pasa, namo bandara awak ka baganti lo den danga,” kato Rantau.

“Ngu lu, aden lun ado naik patabang, lah ka baganti sae. Baa lo citoe tu?” Yuang Pasa protes.

“Indak ado urusan jo Pasa tu doh,” sanggah Malano.

“Ancak danga se carito si Rantau ko lu, baru mambantah,” tambah Kuriak Batuang

“Biko ha,” kecek Rantau sambia mangacau kopi angek.
Den danga namo bandara Internasional Minangkabau nan disingkek BIM kadituka dek pak pati Padang Pariaman jo namo Syekh Burhanuddin.

“Baa ndak jo Imam Bonjol?” Tanyo Pasa.

“Ncak Pak Hatta lai,” jawek Malano.

“Raso dek den rancak Hamka,” jawek Tuan Baralah.

” Kalau manuruik wakden ko ha yo rancak Natsir,” kecek Tembang.

” Ancak ncik Rahmah el Yunisiayah lai nye.” Jawek Rantau.

“Rasuda Said atau Rohana Kudus nan badacak,” jawek Malano manambah pandapek.

“Ndak sak lai, Tan Malaka, itu baru sero,” kata Yuang Pasa sato-sato lo.

“Sabanyak itu sia nan kadipiliah ko ha,” kecek Tembang.

“Kan dek tu lah nye deyen. Dulu ka batuka jo mister Mohd Rasjid. Batal. Kabatuka lo jo Bgd Aziz Chan, indak jadi,” kato Rantau.

“Kini ko liau Syekh Burhanuddin? Bitu?” Pasa batanyo.

Manuruik Pasa indak usahlah tuka-tuka namo tu. Lah batuah mah Minangkabau.

“Kamari pentang mah, kalau ka manuka tantu jo gubernur dan de pe er de provinsi bagai,” solang Baralah.

“Sabanahe harus se izin mantari perhubungan mah tuen,” kecek Rantau.

“Kalau mantun ma habih-habihan ari sen tu nye. Minangkabau tu selah. Di awak banyak tokoh hebat. Terakhir den usul Mohd Yamin, baa gak ti. Baa kok ndak bisa lo?” Pasa tagang urek lihiannyo.

“Bitulah wak lipek se lah usul ko lu, sudah rayo wak bincang baliak. Kini kamari sayuik mah. Baju lun babali gai ko ha, sabanyak antah namo hebat, “ kato Malano.

Supakaik majelis lapau manundo rencana manuka namo palabuhan kapa tabang tu. (Malin Kapalo Koto)

Berani Komen Itu Baik
Tirto.ID
Loading...
To Top