Trending | News | Daerah | Covid-19

Ota Lapau

Dapek Juo Pasa Dagiang Kurban

Dibaca : 308

“Dima lo hukum e tu urang mode pasa ko dapek lo dagiang kurban?” Bakato Bilang ka majilih lapau simpang.

“Wakden dapek lo, tu baa, manyakik dek Bilang?” Kato Malano.

“Dagiang kurban tu untuak nan indak mampu,” jawek Bilang liak.
“Bilang dapek?” Pasa batanyo.
“Lai sajinjiang,” kecek e.

Hampua lapau dek galak. Wer dapek, wee lo nan eboh.

“Nyo bitu mah Bilang nan cadiak candokio, di nagari awak ko, sadoalahe nan misikin dapek. Tingga sangenek nan ndak dapek. Kecek angku imam, agiah sado rumah, ado anak-anak di rumah tu, alun kayo bana urang awak ko lai, indak biati awak surang-surang mancaliak anak-anak cepak cepong makan dagiang. Mako dibagilah ka saluruh rumah di nagari awak ko. Sama gadang ati ari rayo ko, kan lai samo wak danga mah titah angku imam jumaik lalu?” Bakato Pasa. Mode sitirika, licin sakali baju tetrek deknyo.

“Yo lai tau den,”kecek Bilang.

“Kok tau manga lo den bamasalahan nan awak surang mandapek lo mah.”

“Itu lo katuju dek den baa? Lai amuah ati batandiang wak makan dagiang kurban,” kecek Bilang.

“Jan dialiah-aliah tuen, ko ndak soal tandiang ko, tapi manyangkuik pembagian manuruik syariat,” kecek Tembang.

“Ndeh Tembang, lai bagiriak talingo tu? Atau paralu giriak?” Kato Pasa.

“Tembang lai ado dapek?”

“Lah dibuek sup dek amak wak tadi, sudah ko randang lai, ha ha.”

“Kan samo se kalian sadoalahe tu nye, itu rasaki halal, hari rayo haji mah, jan iri jo dengki juo, lai jalai?” Kato Pasa.

Bitulah soal kurban, tiok tahun sajak saisuak memang mode tu. Sadoalahe dapek. **


Baca Juga :

Berani Komen Itu Baik
To Top