Trending | News | Daerah | Covid-19

Ota Lapau

Bareh Yuang Pasa Abis

Dibaca : 1.5K

Yuang Pasa, kapalo arak lapau simpang,babilang bulan ilang, langang lapau dibuek-nyo. Ruponyo nak rang ko pai marantau ka Jambi. Ari abih di rantau, jan kan piti, bansek nyo baok pulang. Dek urang kalau bansek, rantau dipajauah, dek inyo, babaliak pulang.

“Indak takao dek den marantau lai doh, umua batambah juo,”kecek Yuang Pasa, kutiko masuak ka lapau simpang.

“Ha ha ha ha, lah den kecek-an sajaksari, Yuang Pasa mada,”kato Tuak Bilang yanglah taragak jo Yuang Pasa.

Yuang Pasa pulang mengicau petugas di jalan raya, sabanahe urang lah lokdon, pe-es be-be, nan inyo bisa tembus jalan er se-a mako sampailah Yuang Pasa ka kampuang.Tu mah kini lah duduak di lapau.

“Indak buliah kama-kama, pasa alah langang,ka manga awak lai, sapakan duo pakan,lah sabulan, abih tande, pado maliang den di rantau ancak babaliak pulang. Corona cilako,”kecek Yuang Pasa.

“Jadi pulang kosong Pasa namoe mah ye,”kato Malano.

“Kan dek tulah nye den,” semba Yuang Tembang.

“Lah kengen saya sama Tuen Yuang Pasa, rindu berat gue,” tambah Tembang.

“Ang jan mamakak juo Tembang, den puta lihia ang tu beko. Ang danga elok-eloklah, dek corona Chino ko sensa urang sa dunia lai jalai?”

“Kalau itulai tarang dek wak mah Tuen.”
“Jan bacakak juo, ko bareh lah abih di rumah ha,”semba Pakia.

“Pakia ancak aniang, dek den sumpik se nan tagak lai, isi-e kosong, tek baya lah masam mukoe,awak lai pulang dari rantau tapi tak bapiti, bitu bana nasib den lai jaleh dek tu Tembang?”

“Saba Tuan, nan teh talua malam ko, ay yang tekel.”

“Ay tekel-ay tekel cek ang, wak den ampia gilo lai, bareh pembagian anta bilo ka tino,pemerintah ko catat ka catat se, lah menggaretek lutuik den mancaliak,”kecek Yuang Pasa.

“Yuang kecek Buyuang, nasib kami mode tu lo, ko urang lapau malam ko dek lai elok ko nyo, kalau indak batutuik lapau ko mah, sabanta lai tibo polisi, makoe kami duduak jarag-jarang, sosial distensing namoe, minum malam ko ba utang lu, ancak jaleh-jaleh wak jo rang lapau,”kecek Gindo.

“Iko sabana nyo awaklah melanggar peraturan mah Yuang, indak buliah duduak maronggok lai, tapi dek malam ko lai indak labiah 5 urang dan duduak jarang-jarang den raso aman,”kato Malano.

“Kadang awak tagiah den raso,tagiah pai marantau, tagiah duduak di lapau, di rumah bareh lah abis,”kecek Tembang

“Tembang den hampehan kapalo ang tu ka bangku ko beko lai, manyindia se jak tadi, kapalo den sakik, angku mamamak se.”

“Eups jan berang-berang Tuan Pasa, ko negara demokratis ko mah, sia se bisa mengecek.”

“Ndeh yo bajaso ang disikolahan taraso dek den, lah demokrasi lai ang sabuik,ancak anok, baguno dek kami-kami ko,”kecek Pasa.
Malam itu lapau langang karano corona, sabanahe ka capek batutuik mah namun den Yuang Pasa tibo, tapaso dibukak sajuak.Kini malam lah barasua sunyi aniang,lapau batutuik,Yuang Pasa pulang, ko pikiran kusuik. (Malin Kapalo Koto)


Baca Juga :

Berani Komen Itu Baik
To Top