Trending | News | Daerah | Covid-19

Ota Lapau

Banyak Bana Lampu-lampu, Nan Pantiang Kue Rayo

Dibaca : 678

“Jan sagala indak buliah Pasa, banyak bana lampu-lampu mah,” kato Malano

“Apo koh? Asa babunyi se,” jawek Pasa.

“Eee karapai, tu ha di tipi, oto plat merah indak buliah baok pulang kampuang,” kato Malano.

“Sia malarang?”

“Hala hala Pasa yo ketinggalan kereta bana mah. Sia lai kok ndak kapeka,” jawek Malano.

“Embe pasuak, palapeh saelah, banyak bana lampu-lampu kapeka ko mah,” cek Pasa liak.

“Nan pantiang lai ado kue rayo ye ndak,” cek Malano.

“Bato pulo.”

Ota samalam ko soal larangan pajabaik mambaok oto plat merah pulang kampuang.

“Bantuak nan suci barasiah bana mpak dek den,” kecek Malano.

“Indak mantun doh Mak Malano, itu kan supayo jan disalahgunoan oto tu. Banyak oto plat merah, antah sia-sia se nan mambaok,” kato Tembang.

” Apo lah ko ha, a nan jalai dek ang Tembang, jan main tuduah sen,” kecek Tuak Bilang.

“Palapeh selah nye den, manga awak nan iruak bantuak cigak kanai ambek,” naiak suaro Pasa.

“Indak iruak doh, tapi manjalehan,” Tembang mambela diri.

“Manga oto, pejabat gai dilarang kalua daerah, urang ka kayo, harus di rumah sajo,” kato Malano lo liak.

“Malano ko lah samo jo pengawas mpak dek den, sagalo ka nyo larang,” manyolang Pasa.

“Jan salah samek Pasa. Indak wakden malarang doh, tapi pak pati,” Malano mencubo manjalehan duduak parakaro.

” Indak itu nan dipikia doh. Kini ko nan pantiang kue rayo, goreang ikan, baluik, ayam, randang. Indangan rang rumah,” Pasa ma aliah tema.

“Cang tojin bagai,”kato Tembang

“Kalian dek lai mah, co indak mode aden ko, ka kaniang aie mato jalang rayo ko mah,” kecek Malano.

“Jan kufur nikmat Lano, berang Tuhan,” kato Tuan Baralah.

” Baralah aniang selah, jan sato-sato lo, beko den simpai,” kecek Malano.

Galak urang sa lapau dek Malano mode tu.

“Jan galak Pasa, den pusuang kini mah.”

“Manga wakden baagak-agak an? Ko ka galak kok bamanuang, apo urusan?”

“Cimporong balau, Pasa dapek bagian sudah ko mah, liek lah,” kato Malano.

“Co lah resek den, bisa turun ce pe em kamari mah,” kecek Pasa tageh

” Ha ha ha, ce pe em tu ma urus tentara indak rakyaik doh. Salah Pasa mah,” kato Malano.

“Samolah baru jo kapeka malarang baok oto plat merah.”

“Kabae ndak malarang doh tapi ma imbau,” kato Tembang.

“Malarang, maimbau, instruksi zaman kini samo sae,” Bilang manyolang.

“Samo baa ko ha dek Bilang? Makoe sikolah nye den mah,” semba Yuang Pasa.

Lah bih badarai galak di lapau simpang samalam tu. (Malin Kapalo Koto)


Baca Juga :

Berani Komen Itu Baik
To Top