Trending | News | Daerah | Covid-19

Ota Lapau

Bakapusu Urang di Pasa Naik Batih dek Bajalan

Dibaca : 399

Sayampang ari ndak ka rayo, langang pukek pasa. Kini? Sabana bakapusu, bisa naiak batih dek basasak. Mantun banalah kalau ari ka rayo. Jo kuciang-kuciang kamandian.

Lenong dek baputa, lah bi badamok, kadang pinggua induak-induak gai tasanduang. Sadoalahe ba ilau-ilau sae lai.

Nan sabana pakek pintak jo pinto yo anak-anak. Nan kaduo amak paja. Sabanahe nan utamo untuak awak surang.

Malano pagi-pagi lah ka pasa, dulu lo lai dari Yuang Pasa. We-e ka balai jo amak paja dan jo paja-paja. Baranak pinak, lah bantuak pe en es talambek upacara. Bagageh sae.

“Hep bagageh sae Mak Malano, ka bukak kadai?”

“Ndeh ang sagalo ka ang tanyo mah Tembang,” kato Malano nan sa oto jo Malano.

“Alun bakutiak ari lai, lah ka pasa Mak Malano, takuik abih baju rayo?”

“Den takui basasak, kalau lah siang, bantuak samuik di batang jambu,” kato Malano.

“Tek manuka Tek, banyak-banyak ari ka rayo, sakali sataun nye,” kecek Tembang.
Etek tu galak sae.

“Ang bijak bana Tembang, beko den sumpa jo kain basahan muncuang tu,” kecek Malano lo.

“Jan asa mararau se Mak, ongkoi den mak bayia ancak lai,” kecek Tembang.

“Kamari manyebeng sae, ilang piti di dompet tu baru tau.”

“Doa nan elok lah Mak, den ka rayo lo mah,” kato Tembang.

“Woi bacirangiak se teh oto ko, tenggi rasaki den,” kecek Uncu Prewel, sopir oplet tu.

Wee diagiah galah Uncu Prewel karano sangkek mudo-mudo dulu wee baok oto di panurunan bacabuik andel gigi itu. Jo prewel alias gigi perai se oto tu turun. Sajak rumahe didaruak gampo tabik takuik-e lai.

” Aniang selah Ncu, caliak lubang,” kato Malano.

Kini lah tibo di pasa. Eee lah rami. “Yayai kan lah rami urang, peklah,” kato Malano ka bininyo.
Di pasa sabana bagadincik, bakapusu. Ba siensuik bajalan.

“Raso ka naik batih den, latiah den, bantuak e ndak sampai puaso sampai sanjo ko doh,” kato Malano.

“Bantuak talipuak layua se uda mah, alun manga-manga lai. Kok maleh puaso kecek-an se, idok-an lah doso,” marepet bininyo.

“Bonti wak sagonyik lu, sompik na balai mah,” kato Malano. Anak e lah gelisah, baju alun juo babali. Nyo elo-elo tangan amak-e.

“Copeklah Mak, beko abih lo baju wak,” kato anak e nan nomor duo.

Dek kanai sasakan, nyo sasakan lo lakinyo. Nan Malano nak iyo tapi icak-icak litak.

“Copeklah Da, beko ujan lo ari” kato induak barehnyo. Anak baranak tu masuak pasa. Ilang di tangah raminyo urang. (Malin kapalo Koto)


Baca Juga :

Berani Komen Itu Baik
To Top