Ota Lapau

Ambulan Lah Jadi Malaikait Maut Mah Yuang

Indak masuak aka doh ambulan dipakai untuak mambunuah urang. Duo sakali mati.

Ambulan di Padang malanyau urang tu sampai ka lapau ko. Antah preman samo preman antah urang elok samo urang taniayo ndak tau wak doh. Nan jaleh ambulan mambaok urang sakik jo mati kini dipakai untuk mambunuah urang.

“Soal ambulan ko Yuang, aden ado kisah ebat ciek mah,” kato Bilang. Urang salapau manunggu Malin mengecek. Nan wee sangajo baranti.

“A tu curitoan lah,” kato Yuang Pasa.
“Sangkek den babelok galeh mudo dulu, di Sitinjau lauik nin ha, pagi-pagi. Den naik bus ka pai ka Solok dari Padang, tibo di Ladang Padi, marauang ambulan dari arah Solok, marauang lo porider dari bawah, ado pejabat penting lewat. Takapereh oto bus nan den naiaki tuh. Pejabat lewat, ambulan tasakek lo. Berang-berang supor ambulan ko ka supir bus. Caruik se kalua,” kato Bilang.
” aaa tu?
“Mbek cah, jan sasak-an,” semba Malano. Galak urang di lapau simpang itu.

“Turun supir bus ko, a keceknyo ka supir ambulan: dek mayat nan ang baok, heboh lo. Wakden 40 urang di ateh oto, urang iduik sadoalahe, mangarengkang lo waang. Kini ang mundur, mambaok urang mati heboh lo. Minggir. Aniang nanok sopir ambulan ko, mundur jee wee lai,” kecek Bilang.

” Tu yo lo mah, “ kecek Buyuang.
“Tapi ko beda riwayaik-e Bilang. Ambulan dibaok untuk mambunuah urang,” kecek Pakiah.

“Dek lah palak tak ti den.” Kato Bilang.
“Urang kalau lah palak, aka singkek, darah lah naik ka ubun-ubun,” tambah Malano.
“Suai, makoe jan lanteh angan bana,” kecek Tembang.

“Timba baliak mah, walau darah la ka ubun-ubun tapi jan lah sampai mambunuah urang, tigo lo sakali bunuah,” kecek Guru Salek.
“Guru aniang, batal jadi pe en es,” kato Yuang Pasa

“Ha ha lai amuah Guru jadi kapalo ambulan rumah sakik?” Batanyo Malano
“Tak ajan den.”

“Ado lo ambulan ko untuak pacaran mah Yuang,” kecek Kuriang Batuang.

“Babagai Tuang. Kalau ambulan mambaok jenazah biasoe ado di muko urang mahonda mode labah atau bantuak cigak lapa. Kamari berang se. Urang disuruah minggir lah jalai jalan sampik. Lah jalai ambulan tu ngeong-ngeong, mangalah awak ba onda lo di muko?”

“Itu nan tagiah Yuang Pasa,” kato Malano.

“Tu lah nagari ko, ma urus ambulan se ndak salasai, Islam Nusantara lo nan bakaji, lah tabaliak-baliak se.”

Bitulah pagi ko, eboh lapau dan kayo Tuan Baralah juo. Lapau makin padek se isinyo. (Malin Kapalo Koto)

Baca Juga :

Berani Komen Itu Baik
To Top