Pakiah, majilih lapau simpang, lah mambuek maklumat. “Wakden indak ka lapau sabulan ko, kecuali sabana taragak teh talua.”
“Yo lah Kia, kok bitu lo kecek Pakiah, manyarah molah kami,” jawek Yuang Pasa.
Yuang Kuriak nan duduak di suduik sanjo kapatang, ma angguak-angguak balam.
“Bantuak balam jinak Kuriak tampak dek den,” kato Pasa.
“Biati den jo Pakiah ko, urang mahabihan pancarian salamo puaso, wee mandapek,” kecek Kuriak.
“Ha ha ha….jan sagalo ka diurus Kuriak.” Semba Malano.
“Ndak ma urus doh Malano, mengecek se ndak lo buliah?”
“Bae taruih Kuriak, den di belakang,” kato Gindo.
“Jan ma adu-adu urang se karajo baa nye,” kato kapalo arak, Yuang Pasa.
“Yuang, ancak aniang, pado den ampok jo boto paniaram ko.” Kecek Malano lo liak.
“Kok ka bacaran siko bae lah, tapi boto den jan dihampehan, babayia utang,” sabuk Tuak Bilang, sambia menyorongan laci piti.
Pakiah memang ndak bisa ka lapau mode biaso lai, sebab liau ma agiah pangajian Ramadhan dari nagari ka nagari.
Ilemu ugamo-e paguno dek umat, jadi inyo diundang untuk ma agiah pangajian Ramadhan.
“Sabulan ko mintak manas ambo ka majilih lapau, kok ado ota lamak, kaba-kabaan juo,” kato Pakiah.
Pakiah baharok ka kawan-kawannyo supayo puaso jan umpang. Taraweh jan lalai, mangaji jan tingga.
“Danga pengajian ustad, awak lah bi baun tanah surang-surang, kok payah mati bisuak, tasakek angok tu, den lah mangecek an, tugas den lah salasai,” kecek Pakiah.
Pado tamanuang majilih lapau sakutiko. Taraso kecek Pakiah cako.
“Kan awak lai lun baun tanah lai kan Mak,” tanyo Yuang Tembang.
“Waang yo muda matah baru, tapi den caliak sumbayang acok tingga, karajo ang gilo bagitar ka bagitar se, ma intai anak gadih urang, nan babini alun juo lai,” kecek Pakiah.
“Tembak 12 pas, rasoanlah,” kecek Kuriak.
Bitulah sa sanjo ka kapatang, menjalang mugarik. Indak lamo antaro e majilih lapau basugiro andak ka musajik.
Nan Pakiah cigin lakeh, sebab wee sasudah mugarik ka pai mengaji. (malin kapalo koto)
