“Lah bantuak alek buru gadang se nagari ko, kamari bakuwai se urang, mamakak,” kecek Tembang bagitu mencogok di lapau simpang.
“Ko contohe manusia, urang nan nyo urus, karajonyo indak salasai,”kato Gindo.
“Mak Gindo jan kamari malambuik sae, dangalah dek mamak kok indak. Di tipi, di koran, di medsos, di pasa, di lapau, samo se,”kecek Tembang.
“Apo nan dihiruak-an urang?” Batanyo Malano.
“Corona, bansos, be-el-te, pe es be be,” jawek Tembang
“Itu ka itu se bocan den,” semba Pasa.
“Dek bosan tu lah mangko dek baok ka tangah galeh ko, kok lai ka laku.”
“Yo lo mah, sabana hiruak,” kato Pakiah.
“Kalau dek den yo managiah mandanga-e, bi ma adu mato panjaik,adu santiang, itu guno-e pandai mengecek jo manulih,” kato Gindo
“Yolah kalau mantun, paturuik-an banalah, bara talok, sampai tangga sarawa, sampai tangga jari tu, sampai kariang muncuang dek mengecek, bae, pupuah, baa dek Pakiah tu?” jawek Tuak Bilang.
“Kalau dek wakden, ma habih-habih-an ari se tunye.Lah jalai nagari mode ko, awak se lai nan tau surang-surang, usah mahariak mahajan tuah juo, indak ado gunonyo doh,”kato Pakiah lo.
“Kan benar kata saya caka tu ha, tak sia-sia saya sekolah, baa dek Mak Yuang Pasa tu, lai di barih makan paek?” Nyo lapehan pasambahan dek Tembang ke Pasa.
“Ijan den lo ang jadian dekingan lai, kalau mengecek pikua baban tu surang,”jawek Pasa.
“Bato Mak, lah tagak di nan bana badan diri ko ha, indak lo mamak batu doh? Indak paralu suaro den untuak manolong jago mamak dalam pilkada bisuak?”
“Ha ha ha ha ha, suai, catat Tembang, kurang suaro ciek,”kecek Tuak Bilang.
“Jadi menah, den sokong ang, tapi cari 10 suaro lai, kalau lah dapek dek ang, manarimo saketek.”
“Ma amuahe sangenek jeh, sajuta ciek suaro tambah baju kaos, kalau suai, angkek barang, truk barangkek, segala urusan biar ay yang tekel,”kecek Tembang pulo.
“Baliho baa?”Semba Kuriak nan sajak tadi angguak-angguak balam se.
“Baliho lain lo tu, agak gadang tu Mak.”
“Oi Tembang,ang banyak gaya, pokok gitar ciek se nye, anak gadih urang ang hawo, politikus ang jujai, timses ang loge, tapi Pasa jan ang gulai lo, babayia utang tu beko,” nasihat Pakiah.
“Indak ciek juo nan jalai dek Mak Pakiah doh, datang ka rumah beko bia ditarangan urusan politik ko snek ha, baok okok sabungkuih dih,” kecek Tembang sambia galak.
“Yo sabana sadoalahe nan ka dipagalehan Tembang ko, jo Yuang Pasa gai nyo loge juo,” jawek Pakiah.
“Bakirok lah Tembang, kecek-an ka urang nan hiruak di sagalo bukik jo lambah tu, barantilah lai, urang ka rayo, beko abih ari dek gubalo se,”kecek Pasa.
“Indak takao doh Mak, inyo bi santiang surang-surang,” jawek Tembang.
Ari alun lai pukua anam sanjo, tapi urang di lapau lah bi pai, sabab langik lah galok, guruah bakatuntang, sabanta lai ka ujan. Indak lamo antaronyo, ujan labek turun, urang-urang ko lah tibo do rumah, tek baya sadang menyanduak kolak untuak babuko. Lapau simpang sabana sunyi, pintu kadai lah batutuik, urang lapau ka babuko, udaro dingin lo. (Malin Kapalo Koto)
