Agak rami lapau simpang sapagi tadi. Bisuak tutuik. Urang puaso lai. Lah mode di tipi lo lapau ko. Bi alim sadoalahe. Bakupiah kain saruang. Ado lo nan babaju guntiang cino. Biati Yuang Pasa maliek.
“Biati den meliak tuan-tuan lah siak se surang-surang, kapatang mode pareman pasa,” kecek Yuang Pasa.
” Yuang, pai la ka rumah bako lu, jan co parian pacah juo muncuang tu,” kecek Ujang Rantau.
“Tuul, batua bana. Balilah kupiah gak ciek baa nye Yuang. Bukak tenda se ari puaso,” kecek Mak Pakiah menyolo.
“Jan den lo diaja, soal kupiah tu soal geleng mah. Nan pantiang itu, isi di dado wak. Iman ” kecek Yuang Pasa lo.
” Ha ha ha bantuak nan santiang bana ugamo ang Yuang. Sajuak kiro-kiro mandanga. Ko tando-tando lah abih ubek mah ” Tan Tembang, anak mudo manjawab.
“Eeee Tan waang anyia baru, ba Yuang-yuang se. Sangkek uda waang mah Yuang Pasa tu.” Iko masihat Tuan Baralah, urang lapau nan tarui duduak dakek laci.
Sabanahe di kampuang tu tuo-tuo tabu sabuik namo se nye. Kini Tan Tembang memang mudo 3 taun dari Yuang Pasa.
“Yo ampun. Bisuak ba mamak den lai ka Yuang Pasa kalau lah dibalinyo kupiah “ jawek Tan.
Lapau makin rami. Ado Sutan Ranjau. We-e tamakan bana jo kaji, ” barang siapa yang membuang duri di jalan maka ia berpahala,” iko masuak bana ka utaknyo, makoe diagiah gala Sutan Ranjau sabab inyo tarui mambuang apo se nan mahambek urang bajalan.
“Kupiah tu paralu, awak ka puaso. Mah salamo ko puaso ndak pernah.
“Jan sumbarang tuduah se Tan, wakden puaso ko mah,” jawab Yung Pasa.
Alun salasai Yuang Pasa ngecek,lalu amaknyo. Eee bininyo ado lo. Nyo singgah lo ka lapau
“Mak, Yuang Pasa ko disuruah bali kupiah dek ari ka puaso, indak ceknyo. Kecek we-e puaso-e ndak ado umpang doh,” kato Mak Pakiah.
“Lah batune muncuang amak nyuruah nyo puaso, ndak nyo danga. Talingo kuali,” jawab amak e.
“Iyo Mak Pakia, berangi ciek, wak lah buek an pabuakoan, eee inyo tak puaso,” nyo pijak gas dek bini Yuang Pasa. Merah muko paja tu.
” Ha ha ha Yuang, sero makan nasi bagutiak parak siang tu. Uda-uda jagolah arilah parak siang,” nyo gutiak dek tek baya. “Cubolah Yuang,” kato Mak Pakiah.
Ha ha ha badarai galak di lapau sapagi tu. Nan Yuang Pasa lah co kuciang dibaok-an lidi. Nyo maluncua se lai, tarui ka rumah.
“Pado mambuek mariangik,” Yuang Pasa ngecek-ngecek surang se sambia bajalan.( Malin Kapalo Koto )
