“Baa kok kabinet namo kantua mantari-mantari awak ko, Tembang?” Tanyo Yuang Pasa ke Yuang Tembang, nan paliang mudo.
“Ndeh, telat bana ko mah, Mak,” jawek Tembang. Majeilih lapau galak mandanga.
“Baa kok lambek Mbang?” Batanyo Malano.
“Anak TK se tau, masa kapalo arak lapau simpang indak tahu,” jawek Tembang.
Galak lo liak, lapau raso ka badariak-dariak.
“Nan nanarik sudah ko pasti Mendikbud Nadiem Kamarim, ka sibuk,” kecek Tembang.
“Baa kok sibuk lo gai,” tanyo Bilang.
“Banyak mantari mintak pelok an WA, internet gai, kan nyo ahli mah,” jawek Tembang.
“Mantari ko ado ndak abis kuoatanyo?”
“Ma ado, sangko samo ko Mak Malin mantari tu, e yayai ye”
“Ma tau lupo gai mambali.”
“Ma ado Mak, nyo bayia tiok bulan mah, babayian, indak piti inyo kalua doh mode-mode awak ko”
Sakali ko badari bana galak urang sa isi lapau.
“Kalau urang awak baa, lai ado jadi mantari?” Gindo manyolang.
“Tulah, harus e gubernur awak jadi mantari, tapi ka baa juo lai, saba wak satrip ko lu.” Jawek Tembang nan luas pengetahuan perpolitikannyo di lapau simpang ko.
“Indak ado agak surang juo?” Tanyo Pakiah.
“Lai, menteri Arifin Tasrif di ESDM.”
“Urang darek?”
“Yo ndak tau wak doh. Lah diresek- resek di gugel dan jajarannyo jak tadi, ndak sobok dima kampuang keteknyo doh,” jawek Tembang.
“Payah Tembang mah, panek-panek manyikolahan se kaminye,” kecek Gindo.
“Ha ha ha, yo mah ndak bajaso stek alah juo doh,” kecek Yuang Pasa.
Sa isi lapau yo tacangang jo bos Gojek, Makarim. Anak mudo tu sangenek labiah tuo pado Tembang. Sikolah di Amerika, abak e urang Padang Panjang, amak e urang Arab.
“Yo kerek den,” kecek Yuang Pasa.
“Mamak kerek ka kerek se, nan kopi wak ndak babayian,” kecek Tembang.
“Yo kopi ambo indak lo,” tambah Bilang.
Walau mantari dilantik di Jakarta, tapi di lapau simpang ko lah salasai dek apak-apak ko sia mantari nan ka sukses, sia nan kurang pandai.
“Bisuak bisa mambayia espepe anak jo Gojek mah Tembang?” Batanyo Pakiah.
“Mak Pakiah bisa dijua di aplikasi Gojek tu mah, jan bagarah-garah lai,” kecek Tembang.
“Ha ha angko lamari den,” kecek Pakiah.
“Indak Mak, tapi bitulah kecanggihan teknologi kini,”kecek Tembang lo lik.
Bitulah lapau simpang sapagi tadi. Sabana rami dek galak. (Malin Kapalo Kota)
