Samuik Tapijak Indak Mati, Tataruang, Alu Patah Tujuah

Penulis -

Jumat, 15 Juni 2018 - 14:01 WIB

facebook twitter whatsapp telegram line copy

URL berhasil dicopy

facebook icon twitter icon whatsapp icon telegram icon line icon copy

URL berhasil dicopy

“Batanyo ciek Tuen Pasa, apo artie samuik tapijak indak mati, alu tataruang patah tujuah?” Kato Malano

“Hil yang mustahal,” jawek Baralah

“Talipuak layuah,” jawek Pakiah

“Tu pepatah bagarah-garah mah, indak ado gai tu doh,” semba Wan Tengka.

“Tembak ba alamaik, nan ditanyo wakden, nan manjawek kalene-kalene indak tau adat jo budaya Minang, baa indak ka rusak nagari ko,” kato Pasa.

“Pasa bantuak nan ebat bana lo. Kok tau jo adat, baa kok awak harus manyauak di ilia-ilia, bakato di bawah-bawah?” Tanyo Bilang.

“Hehei itu namoe em-ce mah, randah diri,” kecek Tembang.

“Iyo lah parah urang Minang kini mah, harus dibuka sikolah adaik di nagari awak ko lai,” kecek Pasa.

“Cubolah jawek dek Pasa tanyo Malano cako,” kato Pakiah manyasak.

“Danga elok-elok bia den curai den papahkan, pasang talingo kancah wak tu, talingo lai laweh tapi pakak, kalau paralu catat, guru sakali ko manjalehannye,” kato Pasa sok yakin.

“Biko ha,” ceknyo lo. Sudah tu Pasa lah mode Tuak Pucuak manasihati kamanakannyo:

“Samuik tapijak indak mati, alu tataruang patah tujuah tu, mukasuik-e iolah,” Pasa baranti ngecek. Nyo daguak kopi, sudah tu nyo isok rokok. Mangulek lamang gai wee dulu.

“Oi Pasa gadang salero capeklah,” Malano manyasak.

“Sasak lamang se mah, tunggu cah. Jadi biko: itu ungkapan untuak kamanakan awak nan gadih-gadih mah. Wee sopan, bajalan pakai mato, indak kulirik dikau, godain aku dong, mode lagu-lagu mantiak tu doh. Dek sopan-e, dek santun e anak gadih tu, dek bajalan langkah luruih, samuik tapijak indak mati. Itu umpamo mah, bitu banalah wee manata iduik di nan rami. Ciek baru tu. Kok salah den ndak sato sabab kaba urang den kaba-an,” kecek Pasa.

“Di gugel ado tu mah, tau den mah,” kecek Tembang.

“Ko contohe anak mudo tu, sagalo tau, namoe sok tahu, sagalo nak da ulu, utak e kudian,” Pasa berang, tapi galak.

“Ko lah model-e apak-apak maraso santiang, nyo sangko inyo se nan ba adaik,” baleh Tembang.

“Buek an lagu ciek Tembang, bia sero,” kato Malano.

“Malano ka baraja ndak ko?”Pasa bantuak urang kahabisan wakatu.

“Yes tuen guru, lanjut saja, saya menyimak, talingo kancah lah ba pasang jak tadi,” kecek Malano.

“Santiang, biati den. Kito lanjuik yo. Ko kaji maha mah, danga elok-elok, radio rusak baranti ngecek lu: tadi samuik, kini alu lai. Alu tu kan tau surang-surang mah. Itu panumbuak padi di lasuang. Kalau tadi nak gadih itu tapijak samuik indak mati, kini urang nan samo tataruang di alu. Patah tujuah alu dibuek e. Bitu bana karehnyo,” kecek Pasa

“Ko kaki nan samo ko nan tataruang di alu tu?”.Tembang manyolang.

“Indak, tadi kaki ayam, kini kaki amak gajah,” semba Malano.

“Gajah mah? Lampuang?” Batanyo lo Baralah.

“Gajah tailand,” kecek Tembang.

” Ha ha ha yo bi lawak kalian taraso dek deyen,” sabuik Pakiah.

“Alah tu ha manyolang juo, kaditaruihan ndak ko?” Pasa batanyo.

“Njut! Plis dong peklah,” kato Tembang.

“Inti pepatah tu indak lain ioalah untuak manjalehan bara ka rancak e nak gadih wak tapi jo nyo jan garah-garah, jan digemai, jan diloge, ijan diagiah harok,” kecek Pasa.

“Tu namoe pria pehape, mato karanjang, marusak nak gadih urang,” kecek Tembang.

“Kadang-kadang walau awak mada, utak boku, ado juo cadiak- e ye, mode Tembang ko ha,” kato Pakiah pulo.

“Apo beda-e jo Pakiah? Samo-samo mada ha hahaha,” kato Bilang.

“Jadi, padusi tu jan disakiti, wee bisa kareh. Wee bisa membaliak an tumbang laki-laki. Wee kuat karano dijago dek adaik dek keluarganyo dek mamak dek sudaronyo dek dirinyo surang. Makoe kalau basobok masalah dan inyo indak salah, bisa takapere wak deknyo. Itulah mukasuik alu patah tujuah tu,” kecek Pasa.

“Yo lai sabanahe tu Pasa. Lai ndak angku karang-karang se tu?” Malano batanyo.

” Kaba urang den kaba-an Malano. Kok salah den tak sata dow. Samatang pun baitu Malano nan gadang basa batuah, sia guru adaik wak sajak ketek? Lai nyo aja awak tantang itu? Indak kan? Dek awak-awak ko bilalang dapek dek manuai se konyo.

Syukurlah lah tau den stek. Kok indak samo sakali mode Malano dan sa isi lapau ko kan karam surang se wak jadie. Makoe ma datuak-datuak dalam kampuang co jawek kecek Malano ko bia jalai ujuik mukasuik e. Sakitu dari den,” kecek Pasa.

“Yo santiang Pasa, tapi kalau salah nyo ndak sato. Ka calak-calak ganti asah malakik tukang tibo, jadi juo lah. Mokasih Pasa, nan ka masuak sarugo juo lah Pasa andak-e ye,” kecek Malano.

“Beko den cek di gugel yo,” kecek Tembang.

“Kasudahan kaji den mandian juo Tembang ko ko di ulu ayie mah, bia rarak sagalo setan di batang tubuah paja ko,” kecek Pasa.

Ha ha ha ha ha
Sabana abih dek galak se lapau samalan tu. Jo galak lapau ditutuik (Malin Kapalo Koto)

Follow WhatsApp Channel prokabar.com untuk update berita terbaru setiap hari Follow

Berita Terkait

Rirayo, Buruak Manuang Pakiah
Pitih Baru, Badariang
Korona:Ba Bapak Anak Ka Urang Lain, Lai Talok?
Kurenah Puasa di Dunia Maya
Pakiah Mulai Indak Ka Lapau Simpang
Yuang Pasa Kapiradan
Simpai nan Lincah Kenapa Disiksa
Cucuak

Berita Terkait

Kamis, 13 Mei 2021 - 17:47 WIB

Rirayo, Buruak Manuang Pakiah

Kamis, 29 April 2021 - 19:20 WIB

Pitih Baru, Badariang

Selasa, 20 April 2021 - 22:48 WIB

Korona:Ba Bapak Anak Ka Urang Lain, Lai Talok?

Sabtu, 17 April 2021 - 13:46 WIB

Kurenah Puasa di Dunia Maya

Selasa, 13 April 2021 - 01:09 WIB

Pakiah Mulai Indak Ka Lapau Simpang

Berita Terbaru

Artikel

Pukul 23.00 WIB, Uang Tak Laku Lagi di Pasaman

Selasa, 6 Okt 2026 - 20:33 WIB