“Yuang sato libur taun baru ndak?”
“Urus se karajo wak surang-surang, jan wakden lo dicikarawi Pakiah,” jawek Yuang Pasa, kapalo arak lapau simpang.
“Berang-berang se mode cebong jo kampret.”
“Wakden Buyuang Pasa, ndak timses doh,” jaweknyo.
“Tanyo Pakiah tadi kama Tuen libur? “
“Ko ciek lai, Malin Marajo sok-sok kota. Awak urang kampuang ko ndak ado libur-libur doh, tapi bisuak wakden yo pai ka Kik Tenggi jo rang rumah, alah diseo kamar hotel duo malam, ado nan manolong, jo hape se nye, yo kerek den dek dunia kini,” kecek Yuang Pasa lo.
“Ado mik ndak? Bia wak umumkan sapanjang jalan ha, Tuen Yuang Pasa pai libur ka kik tenggi,” kato Tembang.
“Oi Tembang, ang babini lah lai, ari lah gampo rayo, gunuang lah malatui, jan abih dek bagitar se wakatu ang tu” semba Kuriak Batuang nan sajak tadi gilo mahambui-hambui kopi se.
“Kuriak jan sato lo, awak petani, mode aden ko saudagar ndak baa doh,” kato Tuak Bilang.
“Batua, Kuriak parkir lu, adok an kapalo oto kalua,” kecek Yuang Pasa lo.
“Jadi Yuang di hotel a ka lalok di Kik Tenggi tu?”
“Lupo den namoe tapi nan dakek benteng tu ha, maha samalam, tapi baa lai, rengek Tek Baya ko, lintuah den.”
“Dek lai mah,” kato Guru Salek menyemba.
“Guru, danga nasihat denlah, bareh maha, bensin maha, karajo susah, agak luruihlah guru maja anak-anak dih, bia bajaso suak, sahinggo bisa mambantu rakyaik,” kato Pasa.
“Pasa nan iyo-iyo selah, kecek Pasa, Guru Salek ko mantari, indak baban we-e tu doh. Amuah lai nyo jadi guru mah.”
“Kalau Pasa libur, banyak piti e mah ndak, bisa tabali jawi sikua,” kato Bilang.
“Bato pulo, orang kaya.” Jawek Tembang.
“Awak ko jan eboh se maliek urang sanang, basyukur wak, bia balimbak pitinyo sudah tu malimpah ka awak,” kecek Kuriak Batuang.
“Soal badoa Pakiahlah nomor satu, nanga lo Kuriak.” Sulo Malin Marajo.
“Badoalah ciek lu bia den aminkan.” Jawek Pasa.
” Agamo jan dibaok bagarah-garah,” kato Pakiah.
“Kualat beko.” Malano manambah.
Pasa galak mancaliak kawan-kawannyo nan heboh se bantuak murai ka baranak. Itu nan inyo suko dari lapau ko, bakucikak se tiok pagi. Bialah piti kurang-kurang tapi kucikak jalan tarui.
“Jadi bitulah, wak den pulang lu,” kecek Pasa. Sa isi lapau galak tasengeng. (Malin kapalo koto)
