Ota Lapau

Yuang Pasa Sasek Cucuak


“Den sasek cucuak, sudahlah sasek, duo karateh ndak den bukak, kunang-kunang mato deknyo,”

Yuang pasa marutok-rutok se, bantuak angku palo ka ilangan durian.

“Dek apo Pasa, gelisah se kanai gigik salimbado?” Malano batanyo.

“Den sasek cucuak, sudahlah sasek, duo karateh ndak den bukak, kunang-kunang mato deknyo,” kato Pasa. Inyo waktu pemilu 2 ari lalu mancucuak di tepees tigo.

“Upah panjek lah batarimo, barang ndak bacucuak, baa lo tu,” kato Malano.

“Jan sumbarang ngecek  se Lano, ndak nio den piti haram tu doh.”

“Tu baju kaos jo jilbab Piak Manih dari caleg di pokan ari tu baa lo tu?” Batanyo Tuak Bilang.

“Kalau itu rasaki mah,” kecek Pasa sambia galak.

Pasa ndak abih pikia, sajak inyo sato pemilu-pemilu ko, kini ko lah nan angek tadah pado cawan. Kamari malatuih sae muncuang urang. Tibo di tepees ilang aka.

“Yo ilang aka den, sudah mencucuak gambar calon presiden, den cucuak gambar depede. Nan depeer pusek lai den cucuak, nan provinsi jo kabupaten lupo den namo urangnyo, ndak den bukak lipek-e doh. Karateh gadang bana, lipek taba,” kecek Pasa.

“Nan salah cucuak baa citoe Pasa?” Batanyo Yuang Tembang.

“Yo ndak tampak dek den namoe doh, namo partai ko banyak bana, den bae se nan tangah-tangah lai,” jawek Pasa.

“Santiang Pasa mah, den ciek presiden se, nan lain tak dibukak,” kecek Kuriak Batuang.

Ruponyo yo banyak nan indak sempat mambukak surek suaro, baa lai, bitulo pemilu kini.

“Nan jadi pikiran dek den baa kok eboh bana urang kini yo,” kato Pasa.

“Dek santiang-santiang mah,” jawek Tuak Bilang.

“Atau dek baper kato rang kini” kato Pakiah.

“Ulah dek medsos mah Kiah, bantuak cigak takapuang sadoalahe, eboh, antah apola ci-ida-e surang-surang,” kato Tuak bilang lo.

“Kalian jan mamakak juo, ko urusan pulitik tingkek tinggi, parang bintang ko mah, awak-awak ko apolah nan ka di ojak-onjak-an, indak sadar surang-surang,” kecek Gindo menyemba.

“Gindo lah jadi jupen lo kini,” kato Pasa.

“Wakden mengecek nan bana, beko bi anyuik surang-surang, aguik, den tak sato,” jawek Gindo.

“Batua mak Gindo tu mah,”semba Tembang.

“Baa kok batua cek ang?”

“Jan basanda ka radio lutuik, basandalah ka ka pe u. Sabanta lai  diumumkan hasil pilihan wak tu mah, saba stek. Kalau didanga kecek urang? Hiruak, bantuak bunyi galodo.” Urang lapau ta angguak-angguak.

“Iyo juo mah tapi tipi jan dimatian, tambah sensa wak,” kato Pasa.

Lapau simpang sabana rami manonton kuik kon.

“Nagari ko lah sudah mah, asa jan sobe se alah tu,” kato Pasa. We-e tagak meluncua ka ilia. Mungkin nyo ka lakuak mancaliak lado. *

Berani Komen Itu Baik
Loading...
To Top