Trending | News | Daerah | Covid-19

Ota Lapau

Handeh, Sok Romantis Kolak Yuang Pasa Balambin

Dibaca : 509

Di kuduak bana inggok pasangan. Rang rumah ma ajak Yuang Pasa ka pasa.

“Ka pasa wak lai Da, taragok lo piak mambali pabukoan. Taun lalu janji ka janji se.”

“Dululah kau piak, beko den turuik,” jawek Yuang Pasa.

“Amuahe tu dulu-dulu, Da kudian. Bantuak zaman saisuak bana tu mah Da,” kecek rang rumah Yuang Pasa.

“Ha ha bantuak abak jo amak wak ye,” tabasuik galak Yuang Pasa.

“Samo sen lah wak pai. Kalau paralu pacik-pacik tangan wak,” kecek Piak Rancak

” Lai talok? Uda paluak. sapanjang jalan?” Yuang Pasa nyo goda binie.

“Cubolah kok talok, bisa rapek tuak niak mamak deknyo mah,” kato binie.

Akhirnyo Yuang Pasa mengawani bininyo ka pasa mambali pabukoan. Tibo sinan raso ka nyo lutok dek Yuang Pasa.
Kadibali sadoalahe piti ndak cukuik.

“Jan sado ka diago Da, tajilantang se beko sudah babuko, ” kecek rang rumahnyo.

“Tanang selah, sakali-sakali, “ kato Yuang Pasa.

Sadang ma ago-ago kolak pisang, goreng baluik jo karabu saga, tibo sinan Bujang Rantau.

“Da Yuang Pasa, manuka mah,” gutiak Jang Rantau.

“Anok. Babini lah lai bia taraso lamak babuko,” kato Yuang Pasa menyindia.

Mati kutu si Rantau dibuek Yuang Pasa.

Samantang pun baitu we-e bajalan batito. Rang rumah Yuang Pasa lah manjinjiang. Kini balau ka loket oto lai. Ka pulang.
Di loket oto alun panuah. Banyak urang ka pulang sasanjo ko.
Dek bagadincik ka naiak oto kolak pisang Yuang Pasa jatuah. Balambin di aspal. Pacah plastiknyo.

Merepet tek baya nyo. Co embe pacah. Yuang Pasa merah mukoe.

“Dulu selah, den beko, oto ciek lai, ” cek Yuang Pasa ka bininyo.

Yuang bagageh baliak ka pasa. Nyo kaja. Luruih se ka tampek urang manjua kolak.
Dan setelah itu: lah sudah urang babuko nan buyuang baru tibo di rumah.

Masam se muko bini-e. Yuang Pasa tukang olah, kapalo arak, abih mainnyo kalau lah di rumah.

“Yo den salah. Mo-u an dek dek kau yo”

Bini-e aniang sen. Yuanh Pasa abih babuko nyo pai se lai.

“Den ka lapau”
“Ka lapau juo lai. Ka musajik. Tobaik lai,” kato binie.
“Yo musajik” (Malin Kapalo Koto)


Baca Juga :

Berani Komen Itu Baik
To Top