Tadanga kaba urang rantau alah bi pulang. Bajadi banyak-e. Ado ciek nan takilin-kilin, ustad Somad nan dari Riau nin, ka mangaji di Simawang, sudah tu di Malalo.
“Pai wak lah Pasa,” Pakiah ma ajak.
“Dih. Jo apo wak pai?”
“Wak cater oto ciek. Ba iyua wak.”
” Den sato lo,” kato Malano.
“Batigo wak baru,” kato Pakiah
“Bini den pai lo,” kato Pasa.
Alah barampek nan ka pai. Sagonyik sajo lah salusin se.
“Duo oto, sinan wak subuah,” kato pakiah.
Nakrang sabana kerek jo UAS mantun ustad disapo.
“Kerek den abeh deknyo sadoalahe. Salamo ko ndak ado den mandanga kaji mode tu, sabana masuak,”kato Pakiah.
“Abih ilemu Pakiah deknyo?” Pasa batanyo.
Kato Pakiah, bajibun nan tamaik dari Timur Tengah tapi balain-lain sae kaji. Bacakak awak dibuek-e. Pakai berang-berang bagai.
“Kalau nan iko ampek mazhab hapal dek liau,” kato Pakiah.
“Ugamo den yo dangka, kaji UAS ko sabana masuak ka utak den,” kecek Pasa.
“Oooh lah tobaik Tuen Pasa ye, “ manyolang pulo Tembang.
“Baru tau Tembang wee lah tobaik?” Tanyo Malano.
“Tu ma iyo.”
“Sajak baguru ka Pakiah wee lah sadar dah tu tobaik, tapi sumbayang subuah masih tinggi ari,” kato Malano.
“Ba ansua-ansua, nyo indak sakali jadi doh, tananglah,” kato Pakiah.
“Kabae Pakiah mandian wee jo aie siriah malam-malam,” kato Malano.
“Kalau Malano nio beko malam tagak ka rumah ambo,”kecek Pakiah.
“Lah patuik lo mah,”kato Tembang.
“Ko paja bijak ko den randaman ka tabek baru tau,” kecek Malano.
“Jan marabo tuen, tapi ka tobaik,”kato Tembang.
“Baok kain putiah, pisau, sipuluik, pitih merah kabek jo mansiang, anta ka rumah Pakiah” kato Pasa.
“Sirik kalian mah. Nan kadibaok, piti se nye motui ribu,”kecek Pakiah
“Gilo mah, Pakiah didanga? Wee senewen,”kato Malano
Abih dek bagarah se ari. Apak-apak tu bara ari lai ka pai mancaliak UAS. Kaba lah pacah di nagari. Banyak pulo nan baminat pai. (Malin Kapalo Koto)
