Trending | News | Daerah | Covid-19

Ota Lapau

Ujan Woi, Kacang Padi Sapiriang, Goreang Ciek, Rang Lapau

Dibaca : 429

Sudahlah bajaket, bakain saruang pulo. Lah manggarutu majilih lapau simpang. Sajak kapatang ujan labek, kuyuik nagari. Aie gadang, kapalo banda putih, padi di laluak sadang paralu aie. Di kayu cangkuak, padi nan sadang mangguniang rabah dek angin.

Indak manjadi padi doh, rabah dek angin, disasau dek air, rato jo tanah,” kata Bujang Rantau nan pagi-pagi lah tibo di lapau.

Untuang kandang itiak tuen Malano aman,” kecek wee.

Sajak kapatang sabana dareh aie, lado den rusak, baa ka manyemprot pagi ko, ujan tak sudah-sudah,” kecek Pasa.

Sapagi tu lapau sabana panuah, dek dingin, bi mamasan teh talua, kacang padi, goreang pisang sagadang tinju. Pisang rajo lo tu. Sabana lamak.

Apak-apak di lapau tu, nyo angkek kaki ka bangku, nyo sandaan ka meja lutuik-e ciek. Nyo bagalumun padek. Sialiah baganti tibo anak bujang kaciak balari-lari mambali goreng pisang disuruah amaknyo.

Den balapau se lai, sabalah lapau ko, ari ujan-ujan mode ko raso ka sero lo manggaleh kopi,” kecek Malano.

Yo bueklah Malano, bia nyo asa ladiang dek Bilang,” kecek Pasa.

Eee Pasa, kini pasar bebas mah, buliah sen wak manggalehnye,” cek Malano lo.

Oi Malano, urus se lah itiak tu, kok ado taluanyo, jua, kalau panek datang kamari,” kato Pakiah.

Kalau ndak buliah tu baa juo lai. Rang lapau, tambah goreng pisang rajo tu ciek lai, agiah dadaknyo, banyak an,” kecek Malano lo.

Indak lamo antaronyo, pasanan Malano lah tahidang. Sajak tadi lah nyo bae sapiriang kacang padi tambah goreang pisang. Kini tambah lo ciek lai. Sabana bongkong goreang tu.

Sapagi tu dari dapua lapau tu mambubuang asok putiah, di dapua banyak nan tajarang. Dari pintu lapau tampak lo asok dibaok angin pagi.

Matoari alun tampak, urang kampuang lah bi segeh tapi indak bisa ka sawah atau ka ladang.
Raso dapek bonus urang sanagari tu dek bisa libur. Makoe apak-apak sabana rami di lapau simpang. Sabana rami.

Nan Tuan Baralah, urang lapau sabana gego. Sibuk melayani tamu. Sanang utak-e.

Baralah, kok satang,” Pasa mamasan piuduik.
Nyo patiang duo tigo ampek tu, malantiang ujuang api, bau cangkeh. Sabana sero taraso dek Pasa.

Rang lapau, kacang padi sapiriang jo katan, kopi satangah,” kecek Tembang nan baru tibo.

Ha ha ha makoe nye den babini lai, bia bisa jago pagi. Ko lah ampia tangah ari, baru ka jago,” kecek Pasa.

Anok selah, eboh se, sagalo tak elok, den minum ciek lu,” kato Tembang.

Sapagi tu sabana mandanaguang lapau dek suaro, mode labah lalu. (malin kapalo koto)


Baca Juga :

Berani Komen Itu Baik
To Top