“Elok lo taun baru kini taraso dek deyen mah. Ndak doh marcun lai.”
“Aniang sae ye, ndak takojuik-kojuik wak lai, Pasa,” jawek Tuak Bilang.
“Male den, dek ka pilpres mah, ba alim-aliman badan,” kato Tembang menyolang.
“Ang Tembang, bagitar selah jan ugamo lo diurus. Ko ndak pilpres-pilpres bagai doh, iko soal akidah,” jawek Pakiah.
“Anok, kok ndak setuju, anok juo,” kecek Pasa.
“Yo jadi anok wak lai, 1 Januari tu, tanggal bara di bulan Arab?” Batanyo Tembang.
“Tu yo Pakiah nan tau tu nye,” jawek Bilang.
“Eee tanggal bara yo, bulannyo, ndeh lupo den.”
“Pakiah se lupo, apolai awak nan ugamo-e manangai ko,” kato Malin.
“Ndak paralu tau lo doh. Pokok-e jan rayokan malam taun baru. Titik.” Kato Pasa.
” Apo nan titik, den caliak di tipi di Uni Emirat, di Mesir nin ha, dirayoan uang,” sabuik Tembang liak.
“Iyo Tembang?”
“Makoe jan salahan juo den, iyo. Di Monas sasak urang, bajadi rami-e,” kato Tembang lo liak.
” Danga selah kecek ulama jo bupati, abih pakaro, jan mangarengkang juo lai,” Pasa bakutubah.
“Manuruik den biko ha, agiah rakyaik hiburan, jan malarang se bisa. Misal malam 17 Agustus, jadi ado ka gantinyo,” kato Tembang.
“Suai,” kecek Pasa.
“Suai ka suai se.”
Nan jalai malam taun baru patang tu marcun lai ndak babunyi doh. Tapi bini Bilang mangambok se, tarompet jo marcun dan ambui-ambuinyo indak ado nan mambali.
“Bini den mangambok se, rugi galeh,” cek Bilang.
Malam taun baru tu yo sabama piral cek urang kini. Sabalik nagari urang malarang. Pakai surek, pakai spanduk. Apolai ado gampo-gampo, tabik gaca anak-anak.mudo dibuek e. Anak-anak tu ado juo nan mada.
Dek mada tu lah makoe dek ado gampo tabik takuik paja-paja.
“Kok basaluang wak baa, wak undang Melati atau Misramolai,” kecek Pasa.
“Suaiiiiii,” kato Tembang.
“Bilo?”
“Maha mah Pasa jan asa ka malambai se,” kecek Malin.
“Basamo mangko manjadi,” jawek Pasa.
Sapagi tu memang tabik taragak apak-apak tu mahibur diri. Lah panek karajo cari piti. (Malin kapalo koto)
