“Urang lapau jan mode pemerintah lo lai. Lah naik lo harago teh talua, awak ka mambaka nasi gai ka sawah, harago talua itiak naik lo, apo masalah ko?” Tinggi suaro Pasa.
“Ma den tau, dibali ka pasa lah naik sae, kato berita sagalo talua diborong urang dikirim ka Arab. Urang naik haji 5 juta banyak e, makan talua ciek sahari, bitu Pasa,” kato Tuan Baralah.
“Talua sampai ka Makkah yo santiang talua wak ye “ kecek Pasa.
“Cuma di awak lah jarang talua Pasa, tapi tu rasaki dunsanak wak mah, bia tambah kayo wee.”
“Yo lo ye cek den tadi urang kadai se pandai-pandai manaikan mode pemerintah nan lasak badukuang. Ado-ado sen nan ka nyo naikan,” kato Pasa.
“Kalau tu satuju den jo Pasa, indak nyaman wak doh. Tibo-tibo naik, piti sarik,” semba Tuak Bilang.
“Bilang sato lo, padohal wee manggaleh di Pasa mah,” kata Malano.
“Kini kocok teh talua tu ciek lu bia sero snek, agak dingin lagi ko mah,” kato Malano.
“Wakden lu, baru Malano. Teh talua Tembang bia den bayia,” kato Pasa.
“Mantap, tuen Pasa ko elok.”
“Waang kalau ka mandapek, elok sakali,” kato Malano.
Walau harago talua naiak tapi majilih lapau pagi tu bi mamasan teh talua. Teh talua ayam kampuang yo bana ka kuduak rasoe. (Malin Kapalo Koto)
