Ota Lapau

Sabana Rami Kampuang Samalam Ko


Antahlah, bajadi raminyo kampuang jak sajo tadi. Nan gadih-gadih nyo kariai sayok tu, harum-harum. Nan bujang-bujang jan disabuik.

Lah bak bulan 14 jo langik malam. Kecek bulan inyo nan tarang, kato langik inyo nan janiah. Simpang-simpang panuah apolai lapau simpang tampek Yuang Pasa duduak.

Anak-anak lanjo puak kuah. Nan mudo-mudo mamasan kopi. Nan gaek-gaek pai taraweh. Nan mudo pai juo tapi banyak nan indak.

“Yuang baa ndak ka musajik? Datang bulan?” Kawan samo gadangyo nan banamo Upiak Larai, bakicau.

Baca Juga :  Pangeran Ari jo si Megan Baralek, Umaik Sabana Rami Co Samuik di Batang Jambu

“Piak, imbau pak nak kau lah, bia den baretong jo inyo,” jawab Yuang Pasa pulo.

“Nyo lah di musajik, turuik sinan,” jawab Upiak Larai. Nyo tarui ka musajik nan Yuang Pasa lah co baruak ndak tajua.

Ndak lamo antaronyo lalu Angku Malano. Singgah we-e ka lapau.
” Agiah timbakau nomor 5 rang kadai,” kecek Angku.

” Mah ado agiah-agiah. Ko indak rumah bako doh Ngku. Tajua tabali siko,” Yuanh Pasa manyolang. Nan rang lapau Tuan Baralah galak manih se bantuak urang kanai ati

Baca Juga :  Puaso Tibo Kupiah tak Ado

“Taraweh lai Yuang, ambiak uduak ka pincuran,” kecek Angku Malano

” Yo sabanta lai,” kato Yuang Pasa.
“Ha ha Yuang kalau ndak sumbayang, alamaik indak ka basuo wak di akhiraik. Wakden ka surugo nan Buyuang ka narako,” tu kecek Wan Tengka nan baru tibo.

” Usah sumbarang ngecek sae Tengka, utang di lapau lah babayia?” Alun abih Yuang Pasa ngecek lai tibo kamakanannyo.

“Mak ntak tis bali puak kuah.”
“Mintak ka rang kadai, beko mak bayia,” jawab-e
” Jan diutang lo Yuang, untuak nakan tu dibayia kontan. Bitu kalau jadi mamak tu. Lai jalai tuh?” Tengka dapek angin.

Baca Juga :  Lenyai Sakampuang

Yuang Pasa aniang je lai. Nyo layangan pandangan ka labuah, urang samakin rami arah ka musajik.

Tibo-tibo tadanga urang abang.
“Ee lah azan se, japuik kupiah ka rumah cah,” kecek Yuang Pasa.
Inyo maluncua se, lupo bayia puak kuah.

Lah sudah urang taraweh nan inyo tak kunjuang babaliak. Antah kama lah Yuang Pasa manjapuik kupiah. ( Malin Kapalo Koto)

Berani Komen Itu Baik

To Top