Trending | News | Daerah | Covid-19

Ota Lapau

Rayo Abih, Pangana Nak Marantau. Dangalah Nasihat Kawan di Lapau

Dibaca : 548

Agak kusuik pangana Pasa. Rayo abih, pitih abih. Masih ado nan tingga tapi pitih dariang se lai.

“Ndak taraso bocor saku-saku den, abih pitih sirah-sirah, tingga pitih dariang se lai,” keceknyo ka majelis lapau simpang.

“Baa ka indak, Piak Manig babalian pakaian sapatagak, awak sapatagak, anak tungga babeleang ampek, pai lo raun-raun ka Padang, abiha nan ka indak?” Kecek Pakiah, kawannyo sama sa arah ka parak lado.

“Akae tu mah, bia tagak pena Tuan Baralah,” kato Tengka, nan sudah puaso lo maniek bataranak itiak.

“Batua tu samo jo den,” kato Malano tokoe jariang jo cokolaik.

“Ha ha ha lanjo gadang tantu lah iyo,” kecek Tembang anak mudo nan tamaik sikolah tapi maleh mancari karajo. Katoe nyo ingin marantau, ongkos ka pai ndak ado.

“Ciyus den mah Tembang, waang dek masih mintak piti ka abak mah, jadi ndak taraso,” kato Pasa.

“Yo lah babulu mato den mancaliak ang mah, pai lah marantau lai,” kato Bilang manukuak.

“Yo den ka pai, cari ongkos lu.”

” Kama Tembang ka pai?” Pasa batanyo

“Rencana ka Kurinci,” keceknyo.

“Ndeh nan gak main lah stek rantau tu, bia badacak,” jawek Pasa

“Di Kurinci den ka manggaleh kain rencana, ikuik mamak sinan,” tarang Tembang.

“Kok bitu baa juo lai, bilo Tembang kapai?” Ampia sarantak urang batanyo

“Minggu muko, tapi amak den ibo atinyo kalau marantau ka tampek dunsanak,” kato Tembang.

Sa isi lapau tamanuang
Takana curito bujang ka rantau jo ciek ransel. Tibo di rantau manapek ka kadai mamak. Indak lai, bini mamak, mintuo bal kato urang, agak barel atie manarimo. Nan mamak dek sayang ka nakan, batarimo juo. Nakan, anak uni di kampuang. Dulu lah nyo pasankan bana, ” kok lai barasaki ang di rantau Yuang, jikok tibo sinan anak den, si bujang ko, ang tolong nyo bia nyo bisa tagak surang. Indak rela den doh ang sia-sio an anak den.”
Itu nan tabayang dek urang lapau. Nasib mamak di rantau indak sadoalahe elok doh. Karajo jungkia baliak dari pagi buto sampai abih mugarik.

“Janyo den mah, jan pai ka Kurinci lai Tembang, beko kamari bedo mamak batenggang, alun lai mintuo barek atie. Bukannyo ndak tau jo adat. Laki kanyo tenggang, kakak laki ka nyo tenggang, waang ka tenggang, badan e ka nyo tenggang, soal indak manyuruah makan atau nyinyia bana ka jadi masalah mah,” panjang Pasa manasihati.

“Yo itu cek amak malam cako di rumah,” kato Tembang

“Kecek abak ang baa?” Bilang batanyo.

“Cek abak kalau ka marantau, asa jan disapik a lidah di lantai, ndak ngarati den doh,” kato Tembang.

“Samo tu nye, tuka haluan lai, la Jawa selah,” kato Pasa.

“Manuruik den jan lai, di siko selah, ongkos ka rantau tu jadian modal, tanam bawang ncak lai,” kato Tuan Baralah.

“Yo den pikia lu.” Kato Tembang.
Sabanahe ibo ati apak-apak tu malapeh Tembang ka rantau, sabab kampuang tak ado nan ma olah. (Malin Kapalo Koto)


Baca Juga :

Berani Komen Itu Baik
To Top