“Sangsaro den, oto sabana rami. Onda rami lo dari itu, bagadincik. Biasoe tigo jam, kini ampia anam jam ka Padang, sakik pinggang den,” kato Pasa ma agiah kutubah pagi di lapau simpang.
“Pasa nan tea, lah jaleh rirayo, urang rami, pai juo malala,” kato Kuriak Batuang.
“Raun urang, raun pulo awak, sobok macet, marepet,” sambuang Tembang.
“Marantau indak, siko-siko se jak sari, sok-sok raun lo, nan ka datang, usahlah raun rirayo ko Pasa,” sabuik Malano.
“Tapikia dek den, mode tu bana nagari awak ko, antah rancak di labuah antah sabana boneh, oto sansai se sapanjang jalan,” kato Paso liak.
“Oto tantu di jalan, indak mungkin di pamatang sawah bederet-deret doh,” kato Tembang manyolang.
“Lah cadiak ang mode tu cek ang tu paja mudo matah?” Pasa tasimbabau.
“Ya iyalah dari pada seperti tuen Pasar, orang ramai dia pergi juga, apakah yang tuen cari??” Kato Tembang.
“Ang kecek an bupati den babahaso Indonesia gai ka den,” Pasa membulancik.
“Makoe barajo bahaso Indonesia Pasa, bia laweh pergaulan snek,” kato Bilang.
“Manuruik wakden lah batua mah ndak usahlah wak raun-raun lo rirayo ko. Tagiah namoe tu,” kato Malano.
“Ha ha pas, tagiah!” Tembabg basorak.
Walau bakucikak tapi majelis lapau simpang satuju bana jalan paralu dipagadang. Jalan tol paralu dipacapek.
“Salamo ko jalan laweh, jalan tol, ota se nan awak danganye,” kato Pasa.
Inyo ka pai raun-raun tapi wakatu abih di jalan. Tabik muak Pasa, tapi ka sia ka berang.
“Den ka berang mah tapi ka sia ka den lapehan. Kini pinggang ko masih sakik, nasib-nasib,” kato Pasa.
“Pinggang tu lai indak dek nan lain sakik Pasa? Pikia bana lu,” kato Bilang.
“Dek a tuw?” Batanyo Kuriak Batuang.
“Ma wak tahu, Pasa mah nan sakik pinggang,” jawek Bilang.
“Rang kadai, hidangan teh talua untuk Pasa nan sakik pinggang tu ha,” pintak Tembang.
Pasa ma angguak. Pagi baransua tarang, matoari baransua naik, ota di lapau samakin bajujuik. (malin kapalo koto)
