Ota Lapau

Puaso Wak Lai, Kabek Ampu Tangan Tu

Lapau simpang tutuik mulai bisuak. Indak ado curito. Urang ka puaso.

“Tapi malam kan lai bukak.” Kato Malano.
“Lai Tuen, nan puaso awak, jua bali jalan tarui” kato Tembang.

“Ciek lai, ampu tangan kan lai puaso lo. Lai ndak lasak mengetik di hape doh kan?” Batanyo Yuang Pasa.

“Kalau itu yo ndak obeh dek wak doh. Nyo candu bagunjiang di hape tu lain lo mah Mak. Apolai soal tuduah-manuduah. Tak ti wak makin labek mah,” Tembang mangiro-ngiro.

“Yo itu nan den rusuah-an, puaso jalan tarui, hoaks indak baranti, gunjiang manjadi-jadi,” kato Buyung.

“Apo tu nan manjadi-jadi?” Tanyo Gindo.
“Ota politik di hape, walau bulan puaso” jawek Bilang.

“Awak-awak ko pantang tingga Mak, kok dapek daulu tarui. Sudah tu, indak paduli bana atau salah, lai sasuai jo kahandak ati wak, lambuik tarui. Kok dapek bulan puaso ko yo baranti andak-e,” Tembang manyambuang.

“Ampu tangan tu kabek jo kajai” kecek Yuang Pasa.

“Utak nan kadibarisian bulan puaso ko. Ati disucian. Nyaman andaknyo Ramadhan ko Yuang. Kalau satangah-satangah ancak indak puaso selai. Den kecek an lah ka sa isi lapau ko, politik itu mainan duya se tu nye. Ugamo ko tamaknina lah saketek baa nye. Jan napasu politik juo disampaikan. Lah bara pahalo wak. Pahalo dapek, doso tibo. Podo mah. Den caliak awak-awak ko bantuak nan satiang lai lo.” Kato Pakiah

“Taruih Kiah, lah lamo jiwa apak-apak ko indak kanai siram mah,” semba Gindo. Maanguak Yuang Pada jo Malano. Mantun pulo Kuriak Batuang.

” Jadi biko, kakuasaan ko yo mancandu mah. Kok dapek awak se tarui. Kok dapek lo, awak lai. Padohal dalam ugamo awak, serahkan ka ahlinyo. Awak-awak ko sarok kuaci indak jaleh ujuang pangka alah eboh se suok kida, bantuak cigak takapuang. Sensa den maliek. Jadi bisuak sumbayang tareweh wak lu, sudah tu mangaji wak tamaik-an Quran basamo. Dari jam 10 sampai 12. Kok ka lapai sudah tu baelah, tapi jan bagunjiang juo,” kato Pakiah.

“Bana Pakiah, tapi kami indak ado bagunjiang doh Kiah, jan sumbarang tembak se,” jawek Pasa.

“Bato, tadi basuruah wakden mengecek, kini babantah pulo.”
“Tarui Mak Pakiah,” kato Tembang.

“Bulan puaso ko manahan paruik litak, awih, napasu, incek mato, tangan, kaki. Tamasuak ampu tangan. Kalau ndak bisa doh, indak usah se puaso,” jawek Pakiah.

“Jadi menah, puaso partamo Pakiah taragak babuko jo apo bia den balian di pasa,” kato Bilang

“Mmmm roti banta amba, es tebak, kampiun, kolak, goriang baluik, gulai jariang, gulai ayam, alah tu.”

“Kiah babuko tu indak malapehan salero buruak doh, lai jalai tu?” Kato Kuriak.
“Wak den taragak gulai tambusu, dendeang kariang, sambalado tanak. Sudah tu taragak teh es, kolak pisang, kacang padi, onde-onde,” kecek Pasa.

” ha ha ha ha ha salero se sadoalahe, ambu bakabek, salero lapeh. Podo,” kecek Tembang.

Ari lah tinggi majilih lapau simpang, bubar didahului basalam-salaman.

“Wak ka puaso mo-u banyak, fakfu waspahu,” kecek Pakiah. (Malin Kapalo Koto)

Berani Komen Itu Baik
Loading...
To Top