Ota Lapau

Preman Cap Tekong, Tabik Siaknyo, Bulan Puaso

Yuang Pasa yo kerek jo Tuan Mardindin, nan indak sakali juo singgah ma ota ka  lapau simpang.

Kini bulan puaso ko, alun baputiak wakatu asar lai, wee lah tibo. Duduak di palanta. Mamakai baju guntiang cino, kupiah buatan Sjarbaini, walau agak usang snek. Kai  saruang makassar, tarompa datuak.

Tadi Mardindin lah sumbayang ba imam-imam di musajik. Tadanga se capak e mambaco ayatnye.

“Ha Tuan Mardindin, lah tibo mah,” sapo Pasa.

“Yo Pasa, ka main domino, mamatang- matangan ari” keceknyo.

Tapi itu pakan partamo puaso. Kini-kini ko Mardindin jarang kalua rumah lai, inyo di muko tipi se, mancaliak siaran langsuang dari Masjidil Haram. Sabana karam Mardindin di muko tipi. Bininyi nan kamek, nan kalau bajalan badariak lantai dek langkahnyo sabana sanang atie. Mardindin, lakie, preman cap tekong, kini tabik siaknyo. Puaso indak ado umpang, pakaian islami, tiok cacah ka musajik. Kini lah di muko tipi Makkah se.

“Woi, wak poi ka pokan lu mamboli paragaik dapua, ka manggulai untuak babuko. Kabakirim apo wak?” Bini Mardindin batanyo.

“Roti amba, kolak pisang, cindua, rokok sabungkui  alah tu,” kecek Mardindin.

Bini turun, pintu dihampehannya nan Mardindin nan siak lo dari tuanku lai, mangarik dari muko tipi, luruih ka dapua. Indak bangkik-bangkik lai.

Di dapua, Mardindin duduak di kurisi. Nyo santuang makan sapiang kanso. Nyo bae batambuah, sudah tu nyo buek kopi, nyo patiang rokok.

“Yo baa lai, indak talok puaso doh, lunak tulang den deknyo,” kato Mardindin ngecek-ngecek surang.

Kini lah asar, wee bagageh turun, lucun se ka musajik. Abih dari musajik singgah ka lapau simpang, main domino.

“Malawan puaso mah Mardindin,” kato Malano.

“Agak mandaki taraso sahari ko” kecek Mardindin.

“Lah bara lamo Mardindin sato puaso? Mukasuik dek sajak ketek?”

“Ha ha ha sajak umua 10 taunlah”

“Duto, dulu sangkek mudo-mudo kito makan dalam parak wakatu ka pokan okaik,” kato Malano.

“Dulu ndak buliah sabuik lai,” jawek Mardindin.

“Jadi malawan puaso Mardindin ye, indak tahampalehan batu domino dek inyo lai,” kato Pasa.

Mardindin sabana layua, bantua urang indak makan 3 ari. Santiang wee basandiwara. Preman cap tekonglah ka namoe. (Malin Kapalo Koto)

Berani Komen Itu Baik
Loading...
To Top