Trending | News | Daerah | Covid-19

Ota Lapau

Panuah Kapatabang, Kecek Tan Barain

Dibaca : 410

“Kecek Tan Barain nan baru tibo dari Pontianak, sabana panuah kapatabang dek parantau awak,” tu pambukak kecek nan disampaikan dek Yuang Pasa di lapau simpang.

“Si Yun nan balapau nasi di Kalimantan tu pulang lo, tampak dek den tadi di tumporo surau Tuo,” kecek Kuriak Batuang.

“Nyo samo sikolah jo den mah,” kato Pasa.

“Tambah putiahnyo. Anak putiah lo. Nan ciinan den binie sabana rancak,” kecek Kuriak Batuang.

“Kuriak, bini urang jan dicaliak juo. Tundukkan matamu. Jalang wak namoe tu,” kecek Pasa.

“Caliak lah beko dek Pasa, jan malarang-larang urang sen,” kato Kuriak.

“Jadi malah, bia selahnyo. Baa si Yun tu, suksesnyo ye,” kato Pasa.

“Samo jo Tan Barain. Kalau si Yun manggaleh nasi nan Barain manggaleh kain,” kato Kuriak.

“Nyo dima di Kalimantan?” Pasa batanyo.

“Di…”

“Pontianak,” Tembang mamotong.

“Oh yo Kalimantan Selatan mah,” jawek Kuriak.

“Mak Kuriak bara ponten geografi sangkek sikolah dulu?” Tembang batanyo

“Merah,” Pasa nan manjawek.

“Kuriak, Pontianak tu di Kalimantan Barat, samo se barat jo selatan, makoe wakatu sikolah sari utak jan bako. Ko akibaik-e,” semba Wan Tengka.

“Kuriak ko deknyo samo se Makassar jo Manado, Malang jo Semarang, Kalimantan tu ciek se denyo nye,” kato Pasa.

“Ha ha ha ha,” Kuriak galak.

“Jadi baa patabang panuah yo?”

“Cek Barain iyo, lah mode oplet di loket, datang ciek, datang lo ciek lai. Iko alun mendarat di langik lah ado lo ciek lai,” kato Kuriak.

“Oh mantun, sabana rami ye. Tantulah iyo urang ka rayo. Kalau ndak pulang a gunoe marantau,” kato Pasa.

” Kalau ndak pulang baa? Kan mahabiahan piti se tu?” Tembang batanyo.

“Waang dek mudo matah mah, sikolah sayuik, ka rantau indak, malagu lai bisa tapi siko-siko se, jadi ndak jalai dek ang baa rindu kampuang tu,” kato Tuak Bilang nan sajak tadi manyimak sae.

“Tuak Bilang galeh babelok balai ka balai ma jalai dek Tuak rantau,” kato Tembang.

“Saribu porosen batua Mbang, santiang ang. Suko den,” kecek Pasa.

“Jan asa malontong se Tembang, kama ndak-a dek ang? Rantau lah den jalang mah,” kecek Bilang

“Kama se Bilang marantau?” Kuriak batanyo.

“Ka Pakan, Lipek Kain, Selat Panjag, Batam, Dumai, Rengat, Sarolangun. Ka Jawa lai sabanta tigo bulan,”kecek Bilang.

“Rantau suduik dapua mah, sabanta-sabanta. Alun manga-manga lai wee lah pulang, induak bareh nan kini ko ha ma imbau-imbau juo,” kato Pasa.

“Cintaku pada mu memperpendek rantau adinda,” kato Tembang.

“Bato pulo. Ikolah perantau singkek nan ndak pernah mancubo naik patabang. Sajak babini inyo lah babenta pasa ka pasa se lai,” kato Pasa.

“Maleh den di rantau tu, siko piti sinan piti, siko tacaliak urang gaek tiok sabanta,” kato Bilang.
Tasaro kaji dek Pasa.

“Kalau tu suai den jo Bilang mah.”

“Manga marantau jauh-jauh bana,” kato wee liak.

“Eee Bilang janyo den, pado mengecek ancak aniang. Bilang nan ele rantau nan basalahan,” kato Kuriak.

“Ha ha ha ha, kanai Mak Bilang malam ko,” kecek Tembang

“Mbang malagu lah lai, angek kapalo den,” kato Bilang.
Alun jadi malagu lai, lapau basibak. Si Yun parantau nan baru pulang tibo. Nyo salami ciek-ciek. Nyo duduak dakek Pasa.

“Baa Yun ebat ang den danga,” kecek Pasa.

“Mak Baralah teh talaua ciek, lah taragak bana den,” kecek si Yun.

“Den yo lo ” kato Pasa.

“Salingkuang sasak se Baralah, bia sero ota stek,” kato Bilang.
Samalam tu sabana sanang ati nak rang tu mandanga curito si Yun. Bunyi jam dindiang badatang duo kali, sinan lapau dilarai. Pulang ciek-ciek. Sagalo utang malam tu dibayia si Yun. (Malin Kapalo Koto)


Baca Juga :

Berani Komen Itu Baik
To Top