Ota Lapau

Nyo Boikot Lo Awak Woi


“Kerambil nye den, nasi padang lo gai nan ka diboikot, mancaliak randang se, tabik salero buruak tu. Wak caliak lah kok iyo lo  Sabanta lai puaso mah,” kecek Yuang Pasa.

“Boikot nasi padang.” Itu kato-kato di medsos.

“Kerambil nye den, nasi padang lo gai nan ka diboikot, mancaliak randang se, tabik salero buruak tu. Wak caliak lah kok iyo lo

 Sabanta lai puaso mah,” kecek Yuang Pasa.

“A tu Yuang?”

“Nagari ko lah senewen taraso dek den, dek pilpres nasi padang lo ka diboikot,” jawek Buyuang.

“Oooo,” jawek Malano liak.

” Baa kok ooo sen Lano?” Semba Gindo.

“A i u e o, tu lah den  panjangan,” kato Malano sambia mamatiang rokok-e.

“Mukasuik Tuen Malano apo?” Yang Tembang sato lo.

“Bataruah den kok mangkui boikot-boikot tu. Indak bi lapa surang-surang. Alah pakak talingo den sajak saisuak mendanga kot baikot ko mah,” naik simbabau Malano.

“Samo wak mah, boikot produk Amerika, Israel, Cino, indak ado nan mangkui,” kata Yuang Pasa.

“Aden kan urang galeh babelok ko ha, alun ado rumah makan padang nan kanai boikot lai. Nan masuak aka selah, jan baper bana, bak kecek anak-anak kini,” kato Tuak Bilang.

“Kecek asa tabaok dek angok se,” kato Pakiah lo.

“Aaa tuw cito, kopi steng rang lapau,” Kuriak Batuang baru tibo di lapau simpang, we-e langsuang mamasan kopi.

“Kopi se, goreng pisang rajo, indak?” Bilang menyindia.

“Isi lapau ko den bali sadoalahe mah, jan den diago lai.”

“Co Kuriak ko suko den,” kato Pasa.

“Iko mah Riak, rumah makan padang ka kanai boikot taga dek pilpres,” nyo jalehan dek Malano.

“Pilpres tu antian. Alah tu. Warung padang tu ado sampai ka Eropa nin ha. Menjaga persatuan dan kesatuan bangsa tu mah,” kato Kuriak.

“Itu bana Mak nan ka wak kecek an tadi. Sobab biko mah, ado dari Sabang sampai Merauke,” kato Tembang.

“Alah Tembang ka Sabang jo Merauke tu?” Batanyo Pakiah.

“Olun”

“Kerambil nye den,” kato Pakiah.

“Bia den uraikan snek yo. Lai tau nasi ampera? Itu urang Minang se mambapuek tunye. Ampera tu kan amanat penderitaan rakyat,” kato Bilang.

“Tu apo hubungannyo jo  nasi padang, Bilang?” Batanyo Pasa.

“Nan mengecek an boikot nasi padang itu, indak tau sejarah. Nan manggaleh nasi di Indonesia indak urang awak se doh, tapi awak mangarati jo penderitaan rakyat. Kalau ado urang bali nasi bungkui, balabiahan mah sanduak nasie, bisa untuk 2 urang. Dek a tu? Takana nasib badan diri, jan-jan nasi ko dibali untuak 2 urang, piti sayuik. Balabian dek balau sanduaknyo . Jutaan urang tatalong dek nasi padang ko sajak saisuak mah di Indonesia ko,” sabuik Bilang tegas suaro-e mode jupen.

“Tu baa lai Mak Bilang?”

“Waang Tembang mudo matah, den jalehan snek lai. Simak elok-elok, ang pasang talingo kuali tu bia tadanga dek ang.”

“Yo taruilah jan banyak bana rede tu Mak.”

“Nasi padang ko menghidupi Indonesia mah. Co serentak agak sapakan tutuik rumah makan padang ko, tapi jan ari rayo. Kalau itu lah ka jaleh mah. Kini-kini ko tutuik saminggu, umumkan di tipi. Buncah karak buliah Indonesia ko. Urang awak ko ba usaho rumah makan di rantau, bakana mandeh dulu mah Tembang. Barehnyo partamo tu dari tumbuak mandeh tu mah, indak sumbarang tagak se doh, jo jiwa, jo aie mato, jo nasionalisme tagak rumah makan padang tu. Kini lamak-lamak se boikot dek gara-gara pilpres. Jan diuji lo nasionalisme urang Minang lai. Jadi nan mengecek tu jago lalok mah, jan dilawan, padia selah. Soal pilpres itu pulitik se tunye, jan anyuik lo lai. Sajak saisuak, kudo nan balari, awak nan disuruah basorak. Karajo apo tu. Demokrasi? Awak ko sadang baraja ba demokrasi, jadi kalau tadanga kato-kato kasa, boikot nasi padang, itu asa muncuang ka lapeh sen tunye. Sajak pagi, lontong sayur padang disantuangnyo, siang makan nasi padang, manjalang sore kuliner ko ha, nyo masuak ka bofet, Padang juo baru. Malam nyo bae sate,” sabana panjang Bilang mengecek. Tacingagau urang salapau.

“Oh bitu ye,” kato Pasa.

“Bia den telepon urang awak di Jakarta, suruah ado an deknyo pesta kuliner Minang sahari banenenang, bia takakah den makan urang ibukota tu snek ye ndak,” kato Tembang.

Ari baranjak siang, lapau simpang baransua langang, ilang ciek-ciek se. Nan ka sawah, nan ka ladang, nan ka pasa, babagai-bagai. (Malin Kapalo Koto)

Berani Komen Itu Baik
Tirto.ID
Loading...
To Top