Ota Lapau

Lenyai Sakampuang

Ha ha ndak tuha, puaso partamo ko, sabana lenyai urang sakampuang dibueknyo. Yuang Pasa? Lenyai juo, meski badan-e tagok.

Nan lapau simpang sore tadi sabana rami. Apak-apak jo nak mudo main domino. malengah-lengah ari, manunggu kotu babuko. Ada 3 meja nan dipakai untuk main domino, sabana bakatuntang ampeh batu, tapi ado nan kurang. A tu? Galak. Galak ndak bisa dipasoan rupoe doh.

Urang lapau tantu ndak amuah sakadar membuka meja untuk main domino doh. Ada macam-macam pabukoan nan nyo juo. Ado onde-onde, gado-gado, roti amba, kolak pisang, kolak labu. Ado pulo samba manyamba, ayam goreng, talua goreng, gulai kincuang, gulai kamumu dan iko nan sero, gulai kambiang.

Lapau simpang ko mode pasa moderen kato urang kini, sagala dijua urang sinan, tapi indak wee nan punyo barang doh. Wee mbiak untuang se ciek pia duo piahnye.

Kini ciek duo la bi datang urang mambali pabukoan, makin dakek ka sanjo kian rami. Nan mambali anak-anak gadih sen. Inyo bi libur, kanai sarayo dek amak-e.

“Pailah kau ka lapau simpang cah, balian abak kau gulai kambiang,” kato Tek Baya, rang rumah Angku Malano.
Pailah nak gadih tu ka lapau. Di lapau tu ado Yuang Pasa, ado Angku Malano bagai. Mancaliak nak gadih Angku tibo, uranglah galak-galak ketek sen. Pasti abih main Angku Malano dek Yuang Pasa mah.

Tapi Yuang Pasa ndak nyo bulih-an Angku Malano doh. Bantuak malawan lai lo puaso tuo ko ka inyo.

Yuang Pasa tagak se, sudah tu nyo dakek-i anak Angku nan sadang balanjo.
“Bali apo Piak?”
“Bali gulai kambiang, suruah amak.”
“Untuak ayah?” Yuang pas nanyo.
Nak gadih tuma angguak sen.
Dek Yuang Pasa, nyo ambiak sabungkui kolak pisang, kolak labu, onde-onde. Sagalo nan ado sinan. Dimasukkannyo ka dalam asoi gadang, nyo agiahakn ka anak Angku Malano.
“Ko baoklah, mamak mambayia,” cek Yuang Pasa.

Yo bana inyo bayia. Sado nan nyo pasan, tambah gulai kambiang tadi.
“Baa kok Yuang mambayia,” tanyo rang lapau, Tuan Baralah.

“Awak urang Minang ko, bagarah yo bagarah, batampek-tampek. Indak sado alahe dipagarahan doh, makoe baraja adat kalian surang-surang,” kacek Yuang Pasa.
Lapau aniang pukek dibuek-e. Yuang Pasa berang.
“Den yo bansaik, indak kayo doh. Den yo pagarah, den yo dibuluihan urang acok, indak baa gai doh, iduik ko hanyolah sanda gurau. Lai tau kalian sa isi lapau ko, anak Angku Malano tu, dunsanak juo dek den. Abak den babako ka rumah gadang Tek Baya, rang rumah Angku malano ko, jadi anak-e tu dunsanak den, dek kalian lah abih pamatang, abih sawah abih parak, indak ado dunsanak lai, den rambahi kuduak kalian tu beko,” kecek Yuang Pasa.

Lamo lapau aniang dek kecek Yuang Pasa, takana bana surang-surang, awak sakampuang, raso badunsanak lah ilang.
“Kerek den dek Yuang Pasa, banyak baraja awak ka inyo,” kato Ujang Rantau.
“Makoe jan sok tahu ang Jang,” semba Kuriak Batuang sambia mahampe-an domino.
“Indak sok tahu doh, tapi apo nan nyo kecekan dek Yuang Pasa tadi batua tu mah,” kato Ujang.
“Yo batua, tibo di nan ado, kok indak ado?” Kuriak Batuang menyolang liak.
“Oi karapai, badunsanak tu ado ndak ado, samo senye. Bapiti awak, awak baragiah. Indak bapitih awak, yo manarimolah awak. Samo-samo bansaik, samo-samo tak baragiah. nan dunsanak tetap dunsanak, bitu, lai jalai?” Yuang Pasa berang liak
Nan Angku Malano jak tadi duduak manih se.

“Nan ka makan gulai kambiang Malano, nan makan kolak malano, nan kanai berang kami,” kecek Mak Pakiah nan sato pulo main domino.
Yuang Pasa takekeh.
“Ha ha ha, indak angku tanyo gai, darima den dapek piti?” Yuang Pasa mamanciang, tapi indak ado nan batanyo.

Yuang Pasa memang acok ka lapau, tapi nyo punyo ladang lado di Subaliak Bukik. Laweh. Ladonyo panen, harago naik. Piti-e kini banyak pas waktu masuak puaso. ( Malin Kapalo Koto )

Baca Juga :

Berani Komen Itu Baik
To Top