“Pakau den. Pansan. Mode ko bana, uriak samo uriak baradu, mamacak api tu Tan.”
“Yo lai den danga, pancang adu mato panjaik kabae di Pagaruyuang yo? Lah tarang bulan namoe tu mah Yuang.”
” Ko lah bantuak umaik Nabi Luth mah Malin, ndak talok imbau ka imbau se ko lai, dikabek an ka tang jambu amuahe lai ko mah,” kato kapalo arak Lapau Simpang, Yuang Pasa.
“Dulu rabab nan batali kini cubadak nan bagili,” kecek Yuang Tembang.
“Apo tu Tembang?”
“Yo tu, ulagh dalam bondangh mangalepagh.”
” Kecek wak ulagh,
kighoe balau bakapulun di samak,” kato Gindo.
“Warih bajawek pusako batarimo mah Yuang, dulu di surau namoe pa-anak jawi mah, kini legebete” kata Tuak Bilang.
“Indak Legebete doh Tuak tapi el ge be te,” kecek Yuang Pasa.
“Patah lidah den bahaso klese pese tu.”
Bitulah tadanga kaba samalam-malam ari, duo insan bapulun dalam samak. Dicigok dek parik paga kironyo ada sapasang. Takajuik urang rami sabab nan baduo tu samo-samo tambilang.
“Tambilang tanti batanti mah Mak,” kecek Tembang.
“Ang buek lagunyo Tembang, ha ha ha,” kato Mak Pakiah.
Hiruak lapau samalam ko. Co kapa pacah. Maklumlah, ko jarang-jarang basobok, kalau carito alah banyak.
“Sadang nagari kabuik asok, sadang nagari kalam-kalam tanggung, paja-paja anyia tu menggareseh pulo dalam samak, yo samak utak den dek mileniyel ko,” kecek Yuang Pasa.
“Rang lapau ndak bitu doh, teh talua ciek, ko tanaga lah gak kurang mah,” kecek Yuang Pasa pulo.
” Indak mancodak lai Yuang?”
“Aniang selah, kalau ka minum teh talua perai, mintaklah, ay tekel,” kecek Yuang Pasa.
” Eee periuak pasuak, ay tekel lo gai. Bialah kok bitu, awak yo lo mak, teh talua ciek,” kecek Tembang numpang lamak se.
“Tembang, mandangiang pangka talingo tu beko,kalau tabek ado parumbuangnyo, kalau Tembang baa? Babini lah lai nye den.” Kato Gindo.
“Tu kaji manurun mah Mak,” jawek Tembang. “Nan masalah kan legebete ko ha, adu ombeng” kato Tembang.
“Yo susah den mancaliak nagari ko, nan indah dipabuek, lah dipabuek, nan indak tampak alah basuo, ugamo samakin tipih, adat alah lungga,” kecek Pakiah
“Baru tau Kiah? Lah jak sari nagari Pakiah ko rusak mah,” kecek Gindo.
“Tu contohe anak bujang matah tu, antah dek simbabau antah kanai naniang, baputa se pangananyo ka tanglai cangkua, indak tantu deknyo nan lamak,” semba Yuang Pasa.
“Ha ha ha ha, dek makan pupuak pabirik mah Yuang,” semba Malano.
“Lai ndak dek ambui-ambui?”
” Itu iyo juo. Nan padiah itu, poto-poto di HP balampu tu ha,” kecek Pakiah.
“Ndroit namonyo Mak,” kecek Tembang.
“Yo hape roit tu, marusak.”
“Ha ha Mak Pakiah ancak anok,” kecek Tembang sambia main we-a.
Bagalau curito soal jantan samo jantan ko. Bacampua jo galak gadang.
“Anak-nak kini batuko se dek nyo suok jo kida ye?” Kato Kuriak nan sajak tadi galak-galak surang se.
Ndak lai sutan, mandangiang lapau dek suaro galak. Sabana paten samalam ko kiroe di lapau simpang. Sagitu brikingnews sanak. (Malin Kapalo Koto)
