“Santuanglah ndeh bakilik juo lai, kecek Pasa tadi malam, bantuak pelatih lo, karajo ladang lado tu nye,” kato Tuak Bilang, kutiko minum kopi pagi cako di lapau simpang
” Yo sakik ati den, harus-e masuak mah dek Mesir tu,” jawek Pasa.
“Kalau Portugis baa?” tanyo Bilang
“Maleh den, main e ancak tapi ndak sunatrosul,” jawek Pasa.
“Pasa nakan wak si Salah baa ndak main-e?” Tanyo Wan Tengka.
“Lamo Tengka siko lai? Kok lai den pai ka nin cah mananyoan, “ jawek Pasa sumbarang kanai.
“Ka nin kama tu?” Batanyo lo Malano
“Ka Rusia Pasa?” Ujang Kajai anggota baru lapau batanyo.
“Yo ka nin, ka Rusia tu, pai Kajai, sudah ngopi ko wak pai, tapi tanyo Tengka lu lai ka ditunggu wak siko?”
“Lai den tunggu, pailah,” kato Tengka.
Galak lai. Badarai galak pagi tu.
Iko pagi partamo sasudah puaso jo rayo lapau simpang babukak. Sapagi tu perai, dianggap tamu rirayo dek Baralah.
“Wak rayo ko mah, kan pakai kacang tojin kue bolu bagai ko,” kato Pasa.
“Yo perai tapi kopi jan mintak tambah,” sabuik Tengka. Rang lapau, Baralah sonyun sae.
“Sangkek sikola dulu, kan awak-awak main kilik main mah, itu warisan dunia, manga lo diprotes,” kecek Malano.
“Malano main bola limau, ma namuah basamoam jo piala dunia,” kato Pasa.
“Asa banamo main bal, pasti ado kilik, ais, cornel, opset, tulang kariang kanai ujuang sipatu, kanai siku, sleding tekel, a lai tu ha,” kato Malano.
“Cupak pasuak, Malano di SD se indak lolos seleksi main ka kecamatan doh, urang lo nan ba ota,” kato Kajai.
“Jan salah-salah lai, wakden kiper dulu mah,” jawek Malano.
“Wakatu wak kalah lapan satu sari tu Malano kiper?” Pasa batanyo.
“Iyo ha ha ha sabana ele, bola kasuok, inyo ka kida. Bola data indak tatangkok, tangan ba kaos lu tu, minum acok, protes kancang,” kato Baralah.
“Ha ha ha den ndak salah sabanahe doh. Lawan barek bana, PSP yunior banyak dalam tim tu,” jawek Malano.
“Lai takana dek den, limau puruik ndak mangkui doh, supradin teh talua indak manalok, lah co angok kudo, indak talok dek wak lai ha ha ibo den jo Malano,” kato Pasa.
“Jan mengecak lo Pasa lai. Nan bek kanan Pasa, gilo lului se bal ko, indak talok dek pasa menyipak bola lai,” kato Tengka.
“Kucia-kucia den kanai sangkek tu mah,” kecek Pasa.
“Dek a?” Tanyo Malano.
“Nyo hantam dek pemain lawan jo ijuang sipatu-e, sabana ka banak sakiknyo,” kato Pasa.
“Kini tageh-tageh remaja wak main, indak mode wak sari doh,” sabuik Malano.
“Yolah tageh. Santiang. Nan nakan wak si Salah baa kok ndak main nyo?” Tengka manjapuik nan tatingga.
“Rang lapau mokasih, maaf lahir batin, den pai lu, awak ele curito bola dunia, pusuang buliah,” kato Pasa.
“Bagageh se, kama Pasa?” Tanyo Malano.
“Ka Rusia.”
“Manga ka nin.”
“Nonton piala dunia,” jawek Pasa. Tu nyo pai lai.
“Nyo sakik mah padia se nyo pai, paliang ka ladang ladoe tu mah,” kato Tengka. (Malin Kapalo Koto)
