Lapau simpang panuah. Bau minyak arun dibaok-baok angin. Sanjo tu agak gemilang, langik barasia sajuak. Nak rang nan di rantau alah ado nan tibo, sabana sero nagari taraso.
Upiak Mayang, nak gadih Tuan Baralah, kini manjago lapau. Ondeh mak salendangnyo elok ka tali arloji. Ciinan wak mancaliak.
Anak mudo nan dari rantau, bantuak pangeran dari Majapahit nin ha, coga, baju bakacak, lenggang mantap sabana data.
“Bilo ang pulang?” Yuang Pasa batanyo.
“Kapotang Mak,” jawek Nurin anak Oncu Lima, nan di Taruko.
“Baa paruntuangan di rantau, lai elok-elok se ari?”
“Lai Mak, awak di Tanah Abang Mak, agak sandek stek sari, tapi kini lai landai?”
“Ma nyo nduak bareh?”
“Awak olun barumah lai Mak.”
“Hep pompong, kok babaliak ka rantau jan surang se, mancando beko,” semba Malano nan jak tadi bantuak urang ma manjujai sae.
“Joa Nurin pulang?” Malano batanyo pulo.
“Jo patabang Ngku, lai ado rasaki,” kecek Nurin.
“Lai jalai dek ang, amak ang tiok ari ka musajik, sakali wakatu den tanyo. Baa panjang bana doa Tek? Lai tau ang a jawek amak ang?” Malano mambuek paja mudo matah tu tanganggo.
“Kecek amak ang, Malano, anak bujang den surang se di rantau, antah lain makan antah indak. Tiok den suok nasi tabayang juo inyo di den. Ibo ati den Malano. Makoe tiok wakotu, den doakan anak den tu. Untuang-untuang elok nasibnya, batuka juo colak anak den. Ko adiaknyo si Nenen, lah godang pulo, kami tambah gaek juo,” kato Malano maniru amak si Nurin.
Si bujang mata baru pulang rantau tu, tamanuang. Pakek manuang-e. Tu manitiak aie matonyo.
“Lai ang danga kecek Malano tu? Awak nak jantan ko, apolai kalau lah marantau, barek baban mah Yuang. Sanang ati den mancaliak ang pulang lah batuka colok,” kato Buyuang Pasa. Sakali- sakali Yuang Pasa, kapalo arak ko lai barisi.
Ndak lamo antaroe masuak tigo urang lain. Anak mudo.
“Masuak-masuak,” kato Baralah.
“Ko anak sia?” Pasa batanyo.
“Awak Salman, anak Uwan Deri di baringin suduik Mak,” kato nan baju biru.
“Ambo Rino anak Tek Juran cucu Niak Malah “ kato nan baju kawuih.
“Kalau awak anak Mak Ramli, lapau ilia,” sabuk nan babaju balang-balang.
” Segeh- segeh kalian, rancak nagari wak dek anak-anak mode ko,” kato Pasa.
” Dima manggaleh?” Pakia batanyo.
“Kami di Selat Panjang, Ngku “ jawek nak rang tu.
Baru ampek anak mudo singgah di lapau, lah jadi pusat paratian. Curitoe didanga, nan mudo-mudo nan mamadek-madek jalan se di kampuang, lah ciinan lo pai ka rantau.
“Kalian nan ilia mudiak se di kampuang mode masin giliang, masuakan baju ka ransel bi pai lah ka rantau, samak utak den mancaliak kalian mah,” kato Pasa.
“Dek niek lai mah Mak,” jawek nak mudo bakain saruang di suduik.
“Itu nan den suko,” kato Pasa.
Indak taraso wakatu babuko ampia tibo. Surang-surang baransua pai.
“Lah lah pulang lai, ka babuko siko? Kok yo masuak an namo ka daftar kaka Tuan Baralah,” kecek Pasa.
Sagonjik se lah bi pai. Tabuah babunyi. Nagari taraso longgang. Sabanta lai taraso hiruak. (Malin Kapalo Koto)
