Ota Lapau

Lah Bapacu Kudo Pilkada

Yuang Pasa lah duduak di lapau simpang. Tantulah iyo, we-e kapalo arak. Kaki tagak ciek di ateh kurisi. Kopi lah sosoh sajak tadi. Rokok nyo patiang.

“Capek Yuang Pasa tibo mah, jadi imam musajik tadi?” Wan Tengka batanyo sambia tasengeng.

“Ancak aniang Wan, dapek pahalo. Makin ngecek makin salah, makin salah banyak doso, beko tabik simbabau den, malayang badan mode papan tu kalua dek sipak,” kucikak Yuang Pasa tak nyo danga dek kawannyo tu doh.
“Rang lapau kopsteng,” pintak Wan Tengka.Urang lapau basugiro membuek an kopi cap kapal terbang.

” Takana dek wak rang lapau lah tibo calon-calon pilkada ko kamari? Kan kudo pilkada lah bapacu. Wee nan lari awak nan nyo suruah basorak-sorak. Tea.”
“Ha ha ha mako acok ka labuah, lah sapakan ko bantuak alang, bakulik-kulik siko se calon-calon tu. Baju kauih kapatang sakotak mie dibaok kamari. Wan di ladang ka di ladang se “ semba Yuang Pasa.

Sadang lamak ota tibo Angku Malano.
“Kalau ka ma ota se ka lapau manga tu. Mambaok-baok kasiak se jo tarompa ka dalam,” antah sia nan nyo sindia.

“Baa ngku kanai tarajang dek tek baya, kok bantuak ulek lado se Angku pagi ko,” jawab Yuang Pasa.
“Musakuik den kalau minum pagi jan kopi satangah se. Bae gailah kacang padi gai, randamkan roti sarkana tu ka dalam, rokok sabungkuih, bayian kawan. Patang Yuang manarima mpak dek den dari calon-calon pilkada tu,” kata Angku Malano.
Yuang Pasa langsuang ba ilau-ilau. Icak-icak indak ado kajadian

Kapatang di pasa, we-e yo mandapak. Kaduo calon nyo tamui. Dapek baju kaos salusin dari siko salusin dari sinan. Dapek pambali bensin, pulsa, ongkos bagai. Suok kida.
Samantang pun bitu, nan Yuang Pasa, ngaku hanyo dapek baju kaos. Baju tu 24 alai. Diparohnyo. Tingga salusin lain.

Dibaginyo di lapau.
“Nan piti yo lun ado,” katonyo.
Ruponyo Angku Malano ndak bisa dikicuah. Tapaso pagi itu sameja dibayian dek Yuang Pasa.
“Kalau soal pergaluan Yuang Pasa yo kerek wak,” kecek Tan Tembang.

Tan Tembang ko gala baru lakek. Paja tamaik kuliah lah 3 taun tak karajo. Bukan tak dapak, tapi tak nyo cari. Karajoe banyanyi ka nyanyi. Lah bocan kawan-kawannyo lakek gala lai Tan Tembang.

Kambang iduak Yuang Pasa kanai hambok.
“Di pasa sia se tahu jo Yuang Pasa, sabuik selah. Aman wak mah,” kato Tan.
“Bajaso anak digadangan ye. Luas pergaulannyo. Ebat walau jo bareh babali bagadangan,” kecek Angku Malano.

Badarai galak sapagi tu. Nan Yuang Pasa icak-icak galak sabab piti pilkada kapatang abih di lapau ko. Tan Tembang lah mintak rokok lo sabungkuih. (malin kapalo koto)

Baca Juga :

Berani Komen Itu Baik
To Top