Trending | News | Daerah | Covid-19

Ota Lapau

Kelok Sambilan, Alah Ado Mako ka Seso

Dibaca : 730

Kalau soal Kelok Sambilan jan disabuik, umumnyo majelis ota lapau simpang, lah acok lewat sinan. Nak rang kampuang ko acok ka Pakan. Kok indak raun, mancari pinang sambia mambaok barang mudo ka nin. Di pasa pagi di Pakan urang awak se sabalik.

“Kelok Sambilan alah ado mako seso. Gaca den mancaliak pemerintah awak ko,” kecek Yuang Pasa

“Baa bitu Yuang,” kato Tuan Baralah sambia ma elo laci piti. Wee manyongsong piti lanjo anak-anak.

“Tu den kecek-an Baralah abih ari dek mangabalo-an laci tu sen. Lah piral jak patang, alun juo tau lai,” kato Buyuang.

“Aaa tu piral? Spiral lai tau den,” kecek Baralah.

“Antahlah. Badan se nan gadang, pangana singkek,” cek Buyuang.

“Oi Yuang ang jan bantuak jupen lo lai lah. Jalehan se la baa Kelok Sambilan tu,” kato Pakiah.

“Begini, biar den curai den papahkan, danga dek tuan surang-surang agar tidak kuper lagi. Andesten?”

“Andesko andesta tabera bera-beri, a samba, mah nasi, gulai cubadak, ikan teri,” kato Malano.

“Jan ma angkak-angkak juo Malano, beko den gesek pangka turiak tu jo batang cangkiang,” kato Pakiah.

“Agiah, lambut,” semba Tan Tembang

“Woi dangalah. Kelok Sambilan itu kan lah dibuek dek pemerintah mah, rancak bajadi,” kato Yuang Pasa.

“Kalau itu lah tau urang sa Indonesia mah Yuang,” semba Malano

“Malano jan lasak badukuang juo baa nye Danga lah dulu,” kato Baralah.

“Okelah kalau mantun.
Den anok lai.”

“Jadi urang kan manggaleh di ateh jambatan tuh. Galeh jaguang baka. Galeh jariang bagai den danga. Bapoto-poto. Dari sangenek lah basasak bantuak pasa balai ambek. Lah takuik pemerintah Sumatera Barat republik Indonesia raya Asia Dunia ko. Samantang pun baitu wee tak barani lo ma usia dek lah banyak,” kato Pasa. Yo bantuak jupen bana nyo kini

“Tu? Tu baa?” Kato Tembang.

“Anianglah murai. Kini ka dipindahan ka bawah, cabuik lot. Lah sudah. Jadi jambatan itu barasiah lai, ndak do urang manggaleh lai,” kato Buyuang.

“Eee cingkudum.Cimporong anyuik. Manga indak wakatu sangenek dulu disuruah pai. Kok macam ini baru disuruah?” Kato Malano

“Kan lah den takok mah. Manga indak Malano se jadi bupati?” Tanyo Pasa.

“Kalau aden bupati? Alun manggaleh urang sinan lah den larang mah.”

” Yo ndak bak kecek-kecek urang tuo-tuo maminteh sabalum anyuik mancari sabalum ilang. Itu nan kurang dek apak-apak wak ko kini tampak den den,” ko tambahan dari Malano.

“Atau jadian se pasa Kelok Sambilan tu baa, bia den bukak kadai sinan ciek,” kato Baralah

“Baralah, pailah sinan. Jua goreng pisang situ, den sokong,” kato Pakiah tasengeng.

” Pukang lai tadanga den mangecek jadi tadi? Indak buliah manggaleh sinan lai,” kato Pasa.

“Lai Pasa yang hebat; hebat dari pilot, gagah dari bintang pilem. Cek angku kami ko ongok bana ko,” Baralah naik daun.

“Ha ha ha ndak sio-sio den bukak kursus di lapau simpang ko doh. Lah bi cadiak surang-surang,” kato Pasa sambia menggode Baralah mintan teh talua.

“Jadi sodara-sodara mantanlah Kelok Sambilan nan jadi balai ambek tu lah rami baru takana bana dek pemerintah. Wee sibuk mungkin, banyak urusan, tamasuak ba selpi-selpi den danga,” kecek Pasa sambia mambuka kupiah. Nyo latak an kupiah tu di lutuik-e.

“Ado nan bagak? Domino wak lai. Sansai wak bacarito Kelok Sambilab juo. Alah ado mako ka seso,” ceknyo.

Domino dimulai. Ari baranjak malam juo, urang batambah rami sajo. (Malin Kapalo Koto)


Baca Juga :

Berani Komen Itu Baik
To Top